“மகளின் வீட்டிற்கு சென்ற தாய் காத்திருந்த பேரதிர்ச்சி”… பூட்டிய கதவுக்கு பின்னால் ஓராண்டாக மறைந்திருந்த பகீர் உண்மை…. கல்குவாரியில் கிடந்த மனித மண்டை ஓடு…..!

நெல்லை மாவட்டம் கொண்டாநகரத்தைச் சேர்ந்த மகாராஜனும், கடலூர் புதுப்பேட்டையைச் சேர்ந்த அமராவதியும் காதலித்து திருமணம் செய்து கொண்டவர்கள். இருவருக்கும் இரண்டு மகன்கள் உள்ள நிலையில், கங்கைகொண்டான் சிப்காட்டில் வேலை பார்த்து வந்தனர். இந்நிலையில், கடந்த 2024-ஆம் ஆண்டு மகாராஜன் தனது 23 வயது அத்தை மகளான அகிலாவை இரண்டாவது திருமணம் செய்துள்ளார். இதற்கு அமராவதி கடும் எதிர்ப்பு தெரிவிக்கவே, இருவருக்கும் இடையே அடிக்கடி தகராறு ஏற்பட்டு வந்துள்ளது.

மகளைக் காண்பதற்காக அமராவதியின் பெற்றோர் வீட்டிற்கு வந்தபோது, அவர்கள் ஓராண்டுக்கு முன்பே வீட்டைக் காலி செய்துவிட்டதாக அக்கம்பக்கத்தினர் கூறியுள்ளனர். இதனால் அதிர்ச்சியடைந்த பெற்றோர், மகாராஜனைத் தொடர்புகொண்டு கேட்டபோது, அமராவதி கோபித்துக் கொண்டு சென்றுவிட்டதாகக் கூறியுள்ளார். மருமகனின் பதிலில் சந்தேகமடைந்த தாய், உடனடியாக சுத்தமல்லி காவல் நிலையத்தில் புகார் அளித்தார்.

புகாரின் பேரில் வழக்குப் பதிவு செய்த போலீசார், மகாராஜனின் செல்போன் சிக்னல் மற்றும் அழைப்பு விவரங்களைக் கொண்டு அவரது இருப்பிடத்தைக் கண்டறிந்து தீவிர விசாரணை நடத்தினர். அதில், கடந்த ஆண்டு மே மாதம் கங்கைகொண்டான் சிப்காட் அருகேயுள்ள பாப்பாங்குளம் விலக்கு பகுதியிலுள்ள கல்குவாரிக்கு அமராவதியை அழைத்துச் சென்று, பள்ளத்தில் தள்ளிவிட்டுக் கொன்றதாக மகாராஜன் உண்மையை ஒப்புக் கொண்டார்.

இதையடுத்து, சம்பவ இடத்திற்குச் சென்ற போலீசார் கல்குவாரிப் பள்ளத்திலிருந்து ஒரு சேலை, மனித மண்டை ஓடு மற்றும் எலும்புத் துண்டுகளை மீட்டனர். அவை அனைத்தும் தடய அறிவியல் மற்றும் மருத்துவப் பரிசோதனைக்கு அனுப்பி வைக்கப்பட்டுள்ளன. ஓராண்டாக மறைக்கப்பட்டிருந்த இந்த கொடூரக் கொலை சம்பவம் பெற்றோர் கொடுத்த புகாரால் வெளிச்சத்திற்கு வந்துள்ள நிலையில், இதில் வேறு யாருக்கேனும் தொடர்பு உள்ளதா என்ற கோணத்தில் போலீசார் விசாரணையைத் தீவிரப்படுத்தியுள்ளனர்.