கேரளாவில் சமூக வலைதளங்கள் மூலம் பெரும் புகழ் பெற்ற இன்ஃப்ளூயன்சர் ஜோடியான அகில் மற்றும் மேகா ஆகியோரின் தற்போதைய நிலை பெரும் பரபரப்பை ஏற்படுத்தியுள்ளது. ஒரே பகுதியில் வசித்து, காதலித்து கரம் பிடித்த இவர்கள், தங்களது மகிழ்ச்சியான குடும்பத் தருணங்களை யூடியூப் மற்றும் இன்ஸ்டாகிராமில் தொடர்ந்து பகிர்ந்து ரசிகர்களின் ‘கனவு ஜோடியாக’ வலம் வந்தனர். ஆனால், சமீபத்தில் மேகாவைக் காணவில்லை என காவல் நிலையத்தில் புகார் அளிக்கப்பட்டதைத் தொடர்ந்து இவர்களது தனிப்பட்ட வாழ்வில் ஏற்பட்ட விரிசல் வெளிச்சத்திற்கு வந்துள்ளது.
இந்தப் புகார் குறித்து காவல்துறையினர் அப்பகுதியில் நடத்திய சிசிடிவி ஆய்வில், நள்ளிரவில் பணம் மற்றும் நகைகளுடன் உள்ளூர் பேருந்து ஓட்டுநர் ஒருவருடன் மேகா வீட்டை விட்டு வெளியேறியது தெரியவந்துள்ளது. தன்னுடன் வந்த அந்த ஓட்டுநருக்கு சமீபத்தில் அரசு வேலை கிடைத்திருப்பதாகவும், அவர் மீது ஏற்கனவே சில பெண்களுடன் தொடர்பில் இருந்ததாகப் புகார்கள் இருப்பதாகவும் இணையத்தில் செய்திகள் உலா வருகின்றன. இதற்கிடையே, தான் வீட்டை விட்டு வெளியேறியதற்கான முக்கியக் காரணம் தனது கணவர் அகிலுக்குப் பல பெண்களுடன் இருந்த தொடர்புதான் எனக் குற்றம்சாட்டி மேகா வெளியிட்டதாகக் கூறப்படும் வீடியோ ஒன்றும் இணையத்தில் பரவி, பின்னர் நீக்கப்பட்டுள்ளது.
சமூக வலைதளங்கள் மற்றும் சில மலையாளத் திரைப்படங்கள் மூலம் மாதம் சுமார் ரூ.10 லட்சம் வரை வருமானம் ஈட்டும் அகில், இந்த விவகாரத்தை மிகவும் நிதானமாகக் கையாண்டு வருவதாகத் தெரிகிறது. இந்தச் சூழலிலும், தனது மனைவியைப் பற்றி சமூக வலைதளங்களில் யாரும் அவதூறாகப் பேச வேண்டாம் என அவர் தனது ரசிகர்களிடம் கோரிக்கை விடுத்துள்ளார். ஒருகாலத்தில் முன்மாதிரி தம்பதியாகக் கொண்டாடப்பட்ட இவர்களின் இந்தத் திடீர் பிரிவு கேரள மக்களிடையே அதிர்ச்சியை ஏற்படுத்தியுள்ள நிலையில், காவல்துறையின் முழுமையான விசாரணைக்குப் பிறகே இதன் உண்மை நிலவரம் முழுமையாகத் தெரியவரும்.