மரண பயத்தை வென்ற ராணுவ கம்பீரம்… சோஷியல் மீடியாவை அதிர வைக்கும் லடாக் ஹெலிகாப்டர் விபத்து போட்டோ…!

ஜம்மு காஷ்மீரின் லடாக் மலைப்பகுதி என்பது சவால்களும் ஆபத்துகளும் நிறைந்த ஒரு நிலப்பரப்பாகும். இங்கு நிலவும் மோசமான காலநிலை காரணமாக ராணுவ ஹெலிகாப்டர்கள் விபத்துக்குள்ளாவது தொடர்கதையாகி வருகிறது. அந்த வகையில், கடந்த 20-ஆம் தேதி லடாக்கின் டாங்ஸ்டே மலைப்பகுதியில் கண்காணிப்பு பணியில் ஈடுபட்டிருந்த ராணுவ ஹெலிகாப்டர் ஒன்று திடீரென எதிர்பாராத விதமாக மலையில் விழுந்து நொறுங்கியது. இந்த கோர விபத்தில் ஹெலிகாப்டர் சுக்குநூறான போதிலும், அதில் பயணித்த 3 ராணுவ அதிகாரிகள் அதிர்ஷ்டவசமாக லேசான காயங்களுடன் உயிர் தப்பினர்.

இந்த விபத்தில் சிக்கியவர்கள் 3-வது Infantry Division தளபதியான மேஜர் ஜெனரல் சச்சின் மேத்தா மற்றும் ஹெலிகாப்டரை இயக்கிய லெப்டினன்ட் ஜெனரல், மேஜர் ஆகிய உயரதிகாரிகள் ஆவர். விபத்து நடந்த இன்று காலையில் தான் இதுகுறித்த அதிகாரப்பூர்வ அறிவிப்பு வெளியாகி, விசாரணைக்கும் உத்தரவிடப்பட்டுள்ளது. இதற்கிடையே, மரணத்தின் விளிம்பிற்குச் சென்று மீண்ட போதிலும், சற்றும் மனம் தளராமல் நொறுங்கிய ஹெலிகாப்டரின் அருகே பாறையில் அமர்ந்தபடி இந்த அதிகாரிகள் கூலாக எடுத்துக்கொண்ட ‘செல்பி’ புகைப்படம் தற்போது சமூக வலைதளங்களில் தீயாய் பரவி, அனைவரின் கவனத்தையும் ஈர்த்து வருகிறது.

விபத்துக்குள்ளான இந்த ஹெலிகாப்டர் 1970-களில் இந்திய ராணுவத்தில் அறிமுகப்படுத்தப்பட்ட பழமை வாய்ந்த ‘சீட்டா’ (Cheetah) ரகத்தைச் சேர்ந்ததாகும். கடந்த 1984-ல் சியாச்சின் பனிப்பாறையில் பாகிஸ்தானுக்கு எதிராக நடத்தப்பட்ட வரலாற்றுச் சிறப்புமிக்க ‘மேகதூத்’ நடவடிக்கையின் போது இந்த ஹெலிகாப்டர்கள் இந்திய ராணுவத்திற்குப் பெரும் பக்கபலமாக இருந்தன. இருப்பினும், கடந்த சில ஆண்டுகளாக இந்த ஒற்றை என்ஜின் கொண்ட ஹெலிகாப்டர்கள் தொடர் விபத்துகளைச் சந்தித்து வருவதால், இவற்றின் பாதுகாப்புத் திறன் தற்போது பெரும் கேள்விக்குள்ளாகியுள்ளது.

இதன் காரணமாக, பழமையான இந்த சீட்டா ஹெலிகாப்டர்களை ராணுவத்தில் இருந்து படிப்படியாக அப்புறப்படுத்த நடவடிக்கை எடுக்கப்பட்டு வருகிறது. இதற்கு மாற்றாக, இந்தியாவின் ஹிந்துஸ்தான் ஏரோநாட்டிக்ஸ் லிமிடெட் (HAL) நிறுவனம் உள்நாட்டிலேயே தயாரித்துள்ள ‘லைட் யூட்டிலிட்டி ஹெலிகாப்டர்களை’ (LUH) பயன்படுத்த ராணுவம் திட்டமிட்டுள்ளது. மணிக்கு 220 கி.மீ வேகத்தில் செல்லக்கூடிய, 6.5 கி.மீ உயரம் வரை பறக்கும் அதிநவீன திறன் கொண்ட 6 LUH ஹெலிகாப்டர்களை வாங்குவதற்கு ராணுவம் ஏற்கனவே ஆர்டர் செய்திருப்பது குறிப்பிடத்தக்கது.