தமிழக அரசியலில் கூட்டணிக் கணக்குகளும், தலைவர்களுக்கிடையேயான கருத்துப் பரிமாற்றங்களும் நாளுக்கு நாள் புதிய திருப்பங்களைச் சந்தித்து வருகின்றன. அண்மைக்காலமாகத் தமிழக வெற்றிக் கழகம் மற்றும் விடுதலைச் சிறுத்தைகள் கட்சி இடையே பல்வேறு அரசியல் முரண்பாடுகளும், சலசலப்புகளும் வலுத்து வந்தன. விசிக நிர்வாகிகள் தவெகவைக் கடுமையான விமர்சனங்களுக்கு உள்ளாக்கிய நிலையில், தவெக தரப்பிலிருந்தும் எதிர்ப்புக் குரல்கள் எழுந்தன. மேலும், சட்டமன்றத்தில் விசிக சட்டமன்ற உறுப்பினர் வன்னி அரசு பேசும்போது தவெக அமைச்சர்கள் குறுக்கிட்டது உள்ளிட்ட நிகழ்வுகள் இரு கட்சிகளுக்குமிடையே அதிருப்தியை அதிகரித்திருந்தன.
இத்தகைய பரபரப்பான சூழலில், சட்டமன்றத்தில் எதிர்க்கட்சித் தலைவர் உதயநிதி ஸ்டாலின் பேசிய பேச்சு அரசியல் வட்டாரத்தில் பெரும் கவனத்தைப் பெற்றுள்ளது. தவெக அமைச்சர்கள் மற்றும் விசிக உறுப்பினர்களிடையே நிலவிய காரசாரமான விவாதங்களுக்கு இடையே குறுக்கிட்டுப் பேசிய அவர், விசிக தலைவர் தொல். திருமாவளவனைத் தனது “அரசியல் ஆசான்” என்று பாராட்டிப் பேசியது அனைவரையும் ஆச்சரியத்தில் ஆழ்த்தியது. மேலும், திமுக தலைமையிலான கூட்டணி என்பது வெறும் தேர்தல் லாபத்திற்கான கூட்டணி அல்ல; மாறாக அது கொள்கை ரீதியிலான உறுதியான பிணைப்பு என்றும் அவர் தெளிவுபடுத்தினார்.
உதயநிதி ஸ்டாலின் சட்டமன்றத்தில் பேசுகையில், “எங்கள் தலைவருக்கும் அண்ணன் தொல். திருமாவளவனுக்கும் இடையே இருப்பது வெறும் தேர்தல் உடன்பாடு அல்ல. தேர்தலுக்கு முன் ஒரு நிலையும், தேர்தலுக்குப் பின் வேறு நிலையும் எடுக்கும் தற்காலிகக் கூட்டணியும் இதுவல்ல. இன்னும் பெருமையாகச் சொல்ல வேண்டும் என்றால், என்னுடைய அரசியல் ஆசான் தொல். திருமாவளவன் தான் என்று பலமுறை நான் கூறியிருக்கிறேன். எனவே என்றைக்குமே அவருக்கு எங்களுடைய நன்றியைத் தெரிவித்துக் கொள்கிறோம்” என்று உணர்வுபூர்வமாகத் தெரிவித்தார்.
எதிர்க்கட்சித் தலைவரின் இந்தப் பேச்சு, அண்மைக்காலமாக நிலவி வந்த அரசியல் குழப்பங்களுக்கும், பரஸ்பர விமர்சனங்களுக்கும் முற்றுப்புள்ளி வைக்கும் விதமாக அமைந்துள்ளது. திருமாவளவனை ஆசான் என்று உதயநிதி ஸ்டாலின் புகழ்ந்து பேசியது விசிக தொண்டர்கள் மற்றும் நிர்வாகிகள் இடையே பெரும் வரவேற்பைப் பெற்றுள்ளது. தவெக மற்றும் விசிக இடையே காரசாரமான மோதல்கள் நிலவி வரும் நேரத்தில், சட்டமன்றத்திலேயே உதயநிதி ஸ்டாலின் வெளிப்படுத்திய இந்த மதிப்பும் நன்றியுணர்வும் திமுக-விசிக இடையிலான கொள்கைப் பிணைப்பை மீண்டும் உறுதிப்படுத்தியுள்ளது.