கூட்டணி ஆட்சி என்ற கோரிக்கையை திமுக ஏற்றுக் கொண்டு, தோழமைக் கட்சிகளின் உணர்வுகளுக்கு மதிப்பளித்து இடங்களை ஒதுக்கியிருந்தால், தற்போதைய அரசியல் பின்னடைவோ அல்லது கட்சிகள் கூட்டணியை விட்டு வேகமாக வெளியேறும் சூழலோ உருவாயிருக்காது என்று விடுதலைச் சிறுத்தைகள் கட்சித் தலைவர் தொல். திருமாவளவன் தெரிவித்துள்ளார். திருவண்ணாமலையில் நடைபெற்ற நிகழ்ச்சி ஒன்றில் பேசிய அவர், திமுக தலைமையிலான கூட்டணிப் பேச்சுவார்த்தைகள் மற்றும் தற்போதைய அரசியல் நகர்வுகள் குறித்து தனது கருத்துகளை வெளிப்படையாகப் பகிர்ந்து கொண்டார்.
பொதுவாக ஒரு கட்சி தனது பதவியைத் தக்கவைத்துக் கொள்ளவே விரும்பும் என்றும், நாளைக்கே கூட தாங்கள் அமைச்சர் பதவியைத் துறந்து வெளியேற முடியும் என்றும் அவர் குறிப்பிட்டுள்ளார். ஆனால், சுயநல அரசியல் கணக்குகளைத் தாண்டி, பாஜகவுக்கு எதிராக அனைத்துக் கட்சிகளும் ஒன்றிணைய வேண்டும் என்ற பரந்த நோக்கில்தான் விசிக செயல்படுவதாகக் கூறிய அவர், இந்த அரசியல் பார்வையைப் பாராட்டாமல் விசிக மீது ‘துரோகம்’ என்ற முத்திரை குத்துவது நியாயமற்றது என்றும், இந்த கோணத்தில் யாரும் சிந்திப்பதில்லை என்றும் வருத்தம் தெரிவித்தார்.
அரசியல் அரங்கில் விசிக சுதந்திரமாகச் சிந்திப்பதைச் சிலர் சகித்துக் கொள்ள முடிவதில்லை என்று சாடிய திருமாவளவன், திமுகவுடன் மீண்டும் ஒட்டிக்கொள்வதற்காகவே தான் இவ்வாறு பேசுவதாகக் கூறப்படும் விமர்சனங்களை முற்றிலுமாக மறுத்துள்ளார். “நம்முடைய சொந்த ஆசைகளைப் பின்னுக்குத் தள்ளி, கூட்டணித் தலைமையின் மனம் புண்படக் கூடாது என்பதற்காகவே நான் காட்டுமன்னார்கோவில் தொகுதியில் போட்டியிடக் கூடாது என்ற தியாகச் சிந்தனையோடு முடிவெடுத்தேன்” என்று தனது முந்தைய அரசியல் நகர்வை அவர் சுட்டிக்காட்டினார்.
தற்போதைய அரசியல் சூழலில் விடுதலைச் சிறுத்தைகள் கட்சியை திட்டமிட்டு திமுகவுக்கு எதிராகவும், தமிழக வெற்றிக் கழகத்திற்கு எதிராகவும் ஒரு முரணான புள்ளியில் நிறுத்தி வேடிக்கை பார்க்கச் சிலர் முயற்சித்து வருவதாகத் திருமாவளவன் குற்றம் சாட்டியுள்ளார். விசிகவின் தனித்துவமான கொள்கை நிலைப்பாடுகளையும், தியாகங்களையும் கொச்சைப்படுத்தும் நோக்கில் அர்த்தமில்லாத விமர்சனங்கள் முன்வைக்கப்படுவதாகவும் அவர் தனது உரையில் ஆவேசமாகப் பதிவு செய்துள்ளார்.