சூப்பர் குட் நியூஸ்..! இன்று முதல் திருச்செந்தூர் கோவிலில் இந்த கட்டணம் ரத்து… பக்தர்களுக்கு முக்கிய அறிவிப்பு..!!!

வைகாசி விசாகத் திருவிழாவை முன்னிட்டு, அறுபடை வீடுகளில் ஒன்றான திருச்செந்தூர் அருள்மிகு சுப்பிரமணிய சுவாமி திருக்கோயில் நிர்வாகம் பக்தர்களுக்கான முக்கிய அறிவிப்பு ஒன்றை வெளியிட்டுள்ளது. நடப்பு ஆண்டு வைகாசி விசாகப் பெருவிழா வரும் மே 30-ஆம் தேதி கோலாகலமாக நடைபெற உள்ளது. இதனை முன்னிட்டு, இன்று (மே 28) முதல் அடுத்த நான்கு நாட்களுக்கு திருக்கோயிலில் வழக்கமாக நடைமுறையில் இருக்கும் 100 ரூபாய் கட்டணத்திலான சிறப்புத் தரிசனம் முற்றிலும் ரத்து செய்யப்படுவதாக அறிவிக்கப்பட்டுள்ளது.

இந்த ஆண்டு வைகாசி விசாகத் திருவிழாவிற்கு வழக்கத்தை விடப் பெருமளவில் லட்சக்கணக்கான பக்தர்கள் வருகை தருவார்கள் என எதிர்பார்க்கப்படுகிறது. இதனால் பொது மக்கள் மற்றும் பாதயாத்திரையாக வரும் பக்தர்கள் நீண்ட நேரம் வரிசையில் காத்திராமல், அனைவரும் மிக எளிதாகவும் சிரமமின்றியும் சுவாமி தரிசனம் செய்வதை உறுதி செய்யவே இந்த அதிரடி நடவடிக்கை எடுக்கப்பட்டுள்ளது. கட்டண தரிசனம் ரத்து செய்யப்பட்டுள்ளதால், வரும் நாட்களில் பொது தரிசன வழிமுறைகள் மட்டுமே பயன்பாட்டில் இருக்கும் என கோயில் நிர்வாகம் தெளிவுபடுத்தியுள்ளது.