நடுரோட்டில் மின்கம்பத்தில் கட்டப்பட்ட திருடர்கள்… அருகில் இருந்த மர்ம கடிதம்…! மெக்ஸிகோவை உலுக்கும் ‘பேட்மேன்’ நிழல் உலக ஆட்டம்… பாராட்டும் நெட்டிசென்கள்…!!

மெக்ஸிகோவின் ஜலிஸ்கோ மாகாணத்தில் உள்ள லாகோஸ் டி மொரினோ பகுதியில், மோட்டார் சைக்கிள் திருட்டில் ஈடுபடுவதாக சந்தேகிக்கப்படும் நபர்களை ஒரு மர்ம நபர் அல்லது மர்மக் கும்பல் பிடித்து பொது இடங்களில் உள்ள மின் கம்பங்களில் கட்டி வைத்து வருகிறது. அவ்வாறு கட்டப்படும் திருடர்களின் அருகே, அவர்கள் செய்த குற்றத்தை விவரிக்கும் எச்சரிக்கைப் பலகைகளும் வைக்கப்படுகின்றன. இந்த விசித்திரமான சம்பவங்களால் அந்த மர்ம நபர் சமூக ஊடகங்களில் ‘மெக்ஸிகோவின் பேட்மேன்’ என்று மக்களால் அழைக்கப்பட்டு வைரலாகி வருகிறார்.

கடந்த ஜூன் 13-ஆம் தேதி முதல்முறையாக ஒரு நபர் மின் கம்பத்தில் கட்டப்பட்டிருந்ததைக் கண்ட உள்ளூர் மக்கள், ஆரம்பத்தில் இது ஒரு தனிப்பட்ட சம்பவம் என்று நினைத்தனர். ஆனால், அடுத்தடுத்து ஜூன் 17 மற்றும் 19 ஆகிய தேதிகளிலும் இதே போன்ற சம்பவங்கள் அரங்கேறின. இதுவரை ஐந்துக்கும் மேற்பட்ட சந்தேகத்திற்குரிய திருடர்கள் இவ்வாறு பொது இடங்களில் கட்டி வைக்கப்பட்டுள்ளனர். அனைத்து சம்பவங்களும் ஒரே பாணியில் நடப்பதால், இதற்குப் பின்னால் ஒரு தனிநபரோ அல்லது ஒரு திட்டமிட்ட குழுவோ இருக்கலாம் என்று சந்தேகிக்கப்படுகிறது.

இந்த சம்பவங்கள் இணையத்தில் காட்டுத்தீயாய் பரவி வரும் நிலையில், சமூக ஊடகங்களில் பலர் இந்த மர்ம நபரை குற்றங்களுக்கு எதிராகப் போராடும் ஒரு உண்மையான ‘ஹீரோ’ என்று பாராட்டி வருகின்றனர். இருப்பினும், உள்ளூர் காவல்துறை மற்றும் அரசு அதிகாரிகள் இந்தச் செயலுக்குக் கண்டனம் தெரிவித்துள்ளனர். சட்டம் மற்றும் ஆதாரங்களின் அடிப்படையிலேயே குற்றவாளிகள் தண்டிக்கப்பட வேண்டும் என்றும், யாராக இருந்தாலும் சட்டத்தைக் கையில் எடுக்க அனுமதி இல்லை என்றும் தெரிவித்துள்ள போலீசார், இந்த விவகாரம் குறித்து தீவிர விசாரணை நடத்தி வருகின்றனர்.