ரயில் இன்ஜினில் இருந்து நபர் ஒருவர் டீசலைத் திருடிச் செல்லும் அதிர்ச்சியூட்டும் வீடியோ ஒன்று சமூக வலைத்தளங்களில் மிக வேகமாகப் பரவி வருகிறது. அந்த வீடியோவில், ரயில் தண்டவாளத்தின் ஓரமாக நின்றுகொண்டிருக்கும் நபர் ஒருவர், அங்கிருக்கும் ஒரு டீசல் இன்ஜினில் இருந்து பைப் மூலம் எரிபொருளை ஒரு கேனில் நிரப்புகிறார். மற்றவர்களின் கண்ணில் படாமல் இருக்க, அந்த கேனை ஒரு சாக்கு மூட்டைக்குள் மறைத்து வைத்திருப்பது அந்த வீடியோவில் தெளிவாகத் தெரிகிறது.
இந்த வீடியோ எக்ஸ் தளம் உள்ளிட்ட பல்வேறு சமூக வலைத்தளங்களில் பகிரப்பட்டு வருகிறது. குறிப்பாக, “இது பீகார் பாஸ். இங்கு டீசல் இன்ஜினில் இருந்தே சாக்கு மூட்டைக்குள் டீசல் திருடப்படுகிறது” என்ற கிண்டலான வரிகளுடன் பல பயனர்கள் இதனைப் பகிர்ந்து வருகின்றனர். இதனால் இணையத்தில் இது பீகாரில் நடந்த சம்பவமா அல்லது வேறு எங்காவது நடந்ததா என்ற விவாதம் கிளம்பியுள்ளது.
இன்ஜின் நின்றுகொண்டிருக்கும் போதே மிகச் சாதாரணமாக ஒருவர் வந்து எரிபொருளைத் திருடிச் செல்வது ரயில்வேயின் பாதுகாப்பு ஏற்பாடுகள் குறித்த பெரும் கேள்விகளை எழுப்பியுள்ளது. இருப்பினும், இந்த வீடியோ உண்மையில் பீகாரில் தான் எடுக்கப்பட்டதா அல்லது வதந்திகளைப் பரப்புவதற்காக அவ்வாறு கூறப்படுகிறதா என்பது குறித்து அதிகாரப்பூர்வமான உண்மைத் தகவல்கள் இன்னும் உறுதிப்படுத்தப்படவில்லை.