கோயில் பிரசாதம்னு கொடுத்தா நம்பாதீங்க…! சென்னை பெண்களை குறிவைத்து நூதன மோசடி…! ஆன்லைன் கேமால் திருடியாக மாறிய பெண்… பகீர் சம்பவம்…!!

சென்னை திருவல்லிக்கேணி பகுதியில் கோயில் பிரசாதம் என்று கூறி மயக்க மருந்து கலந்த பால்கோவாவை கொடுத்து பெண்களிடம் நகை திருடிய ரவணம்மா என்ற பெண் போலீசாரிடம் சிக்கியுள்ளார். ஆன்லைன் விளையாட்டுகளில் அடிமையாகி பல லட்சங்களை இழந்த இவர், அந்தக் கடனை அடைப்பதற்காக இந்த நூதன திருட்டு வழியைத் தேர்ந்தெடுத்துள்ளார்.

 வீட்டில் தனியாக இருக்கும் பெண்களைக் குறிவைத்து, இனிப்பு கொடுத்து அவர்கள் மயங்கியதும் நகைகளை அபேஸ் செய்வதை வாடிக்கையாகக் கொண்டிருந்தார். சிசிடிவி காட்சிகள் மூலம் அடையாளம் காணப்பட்ட இவரிடமிருந்து சுமார் 19.5 சவரன் தங்க நகைகளை ஜாம்பஜார் போலீசார் பறிமுதல் செய்துள்ளனர்.

விசாரணையில், ரவணம்மா ஏற்கனவே கொடியரசி என்ற பெண்ணிடம் 21 சவரன் நகைகளை இதே பாணியில் திருடியது அம்பலமானது. தற்போது சுஜாதா என்பவரிடம் 6 சவரன் நகையைப் பறிக்க முயன்றபோது கச்சிதமாகப் பிடிபட்டார். அறிமுகம் இல்லாத நபர்களிடம் இருந்து உணவுப் பொருட்களை வாங்க வேண்டாம் என்றும், யாரையும் சந்தேகத்திற்கிடமாக வீட்டிற்குள் அனுமதிக்க வேண்டாம் என்றும் சென்னை மாநகர காவல்துறை பொதுமக்களுக்கு எச்சரிக்கை விடுத்துள்ளது.