“என் ஜாதகம் பார்த்தாச்சு”… இனி நடக்கப்போவது இதுதான்…. எதிரிகளை அதிரவைத்த தவெக வேட்பாளர் கனிமொழி….!

தமிழகச் சட்டமன்றத் தேர்தல் வரும் ஏப்ரல் 23-ஆம் தேதி நடைபெறவிருக்கும் நிலையில், களம் தற்போதே சூடுபிடிக்கத் தொடங்கியுள்ளது. ஆட்சியைத் தக்கவைக்க திமுகவும், மீண்டும் கைப்பற்ற அதிமுகவும் மல்லுக்கட்டும் வேளையில், தமிழக வெற்றிக் கழகம் (தவெக) மற்றும் நாம் தமிழர் கட்சி போன்ற கட்சிகளும் தீவிரப் பிரச்சாரத்தில் ஈடுபட்டுள்ளன. குறிப்பாக, கோவை கவுண்டம்பாளையம் தொகுதியின் தவெக வேட்பாளராகப் போட்டியிடும் ஜோதிடர் கனிமொழி, தனது தனித்துவமான அணுகுமுறையால் தொகுதி மக்களின் கவனத்தை ஈர்த்து வருகிறார்.

சமீபத்திய நேர்காணல் ஒன்றில் பேசிய கனிமொழி, தான் ஒரு ஜோதிடர் என்பதால் தனது ஜாதகத்தில் கிரக நிலைகள் சாதகமாக இருப்பதை உறுதி செய்த பின்னரே அரசியலில் கால் பதித்ததாகத் தெரிவித்துள்ளார். மே மாதம் நடைபெறவுள்ள குரு பெயர்ச்சியின் போது தேர்தல் முடிவுகள் வெளியாக இருப்பதைச் சுட்டிக்காட்டிய அவர், அந்த காலகட்டம் தனக்கு மிகவும் சிறப்பாக அமைந்திருப்பதால் வெற்றியை ஆவலோடு எதிர்பார்ப்பதாகக் கூறியுள்ளார். “தளபதி என்றாலே வைப் தான்” என்று உற்சாகத்தோடு கூறும் அவர், தவெகவின் கொள்கைகளும் தனது சேவை மனப்பான்மையும் ஒத்துப்போவதே அரசியலுக்கு வந்ததற்கான காரணம் என விளக்கியுள்ளார்.

தொகுதி மேம்பாடு குறித்துப் பேசிய அவர், கவுண்டம்பாளையம் தொகுதியில் 60 சதவீதத்திற்கும் அதிகமான கிராமப்புறப் பகுதிகள் அடிப்படை வசதிகளின்றிப் புறக்கணிக்கப்பட்டுள்ளதாகக் குற்றம் சாட்டியுள்ளார். சுகாதாரம், குடிநீர் மற்றும் போக்குவரத்துப் பிரச்சினைகளைச் சரி செய்வதோடு, குறிப்பாகப் பின் தங்கியுள்ள ஆனைகட்டி பகுதிக்குத் தனித்திட்டங்களைச் செயல்படுத்தத் திட்டமிட்டுள்ளதாகவும் அவர் உறுதியளித்தார். மேலும், ‘ஆட்டோ பைலட்’ முறையில் நலத்திட்டங்களைச் செயல்படுத்தி, தொகுதி மக்களின் குரலாக (Voice of Goundampalayam) சட்டமன்றத்தில் ஒலிக்க விரும்புவதாகவும் அவர் குறிப்பிட்டார்.

மக்களுடன் எப்போதும் நெருக்கமானத் தொடர்பில் இருப்பேன் என்று உறுதி கூறிய கனிமொழி, தான் வெற்றி பெற்றால் மக்களே எம்எல்ஏக்களாகச் செயல்படுவார்கள் என உணர்ச்சிப்பூர்வமாகத் தெரிவித்தார். நடிகர் விஜய் அவர்கள் தொகுதிக்கு வராதது குறித்துப் எழும் கேள்விகளுக்கு, அவருக்குள்ள அழுத்தங்களே காரணம் எனப் பதிலளித்த அவர், தற்போதைக்கு மக்களிடையே நம்பகத்தன்மையை ஏற்படுத்துவதே தவெகவின் முதன்மையான பணி எனக் கூறினார். புதுமுக வேட்பாளராக இருந்தாலும், மக்களின் நம்பிக்கையைப் பெற்று மாற்றத்தை உருவாக்குவேன் என்ற பெரும் நம்பிக்கையுடன் அவர் தனது இறுதிப் பிரச்சாரத்தை மேற்கொண்டு வருகிறார்.