‘அட்டகத்தி’, ‘குக்கூ’, ‘விசாரணை’ மற்றும் சமீபத்தில் வெளியாகிப் மாபெரும் வெற்றி பெற்ற ‘லப்பர் பந்து’ திரைப்படங்களின் மூலம் தமிழ் சினிமா ரசிகர்களின் மனதை வென்ற திறமைமிக்க நடிகர் ‘அட்டகத்தி’ தினேஷ். 42 வயதாகும் இவர், இதுவரை திருமணம் செய்துகொள்ளாமல் இருந்து வந்த நிலையில், இவரது காதல் வாழ்க்கை குறித்துத் திரைத்துறையில் பல்வேறு கிசுகிசுக்கள் நீண்ட நாட்களாகவே வலம் வந்தன.
இந்நிலையில், சன் தொலைக்காட்சியின் பிரபல தொகுப்பாளினியான எழிலரசியை நடிகர் தினேஷ் காதலித்து வருவது தற்போது அதிகாரப்பூர்வமாக உறுதியாகியுள்ளது. தினேஷின் பிறந்தநாளை முன்னிட்டு, அவருடன் நெருக்கமாக இருக்கும் சில புகைப்படங்களை தனது இன்ஸ்டாகிராம் பக்கத்தில் பகிர்ந்துள்ள வி.ஜே. எழிலரசி, “என் அன்பிற்குரியவருக்கு இனிய பிறந்தநாள் வாழ்த்துகள்… வாழ்க்கையில் ஏற்ற இறக்கங்கள் எதுவாக இருந்தாலும், ஒவ்வொரு முறையும் நான் உன்னைத்தான் தேர்ந்தெடுப்பேன்” என மிக ஆழமான காதல் வரிகளுடன் வாழ்த்தியுள்ளார்.
இந்த உருக்கமான பதிவின் மூலம் இருவரின் காதலும் வெளிச்சத்திற்கு வந்துள்ளதை அடுத்து, கடந்த சில ஆண்டுகளாக நிலவி வந்த விகாரமான வதந்திகளுக்கு முற்றுப்புள்ளி வைக்கப்பட்டுள்ளது. இதைப் பார்த்த சினிமா பிரபலங்களும் ரசிகர்களும், “ஒருவழியாக நம்ம கெத்து தினேஷுக்குப் பொண்ணு கிடைச்சிருச்சு, சீக்கிரமே திருமணத் தேதியை அறிவிங்கப்பா” எனச் சோஷியல் மீடியாவில் வாழ்த்துகளை அள்ளித் தெளித்து வருகின்றனர்.