திரைக்கதை ஜாம்பவான் கே. பாக்யராஜ் அவர்களின் திடீர் மறைவு தமிழ் திரையுலகை உலுக்கியுள்ள நிலையில், அவரது இறுதி சடங்கில் ஊடகங்கள் நடந்துகொண்ட விதம் பெரும் சர்ச்சையை ஏற்படுத்தியுள்ளது. மறைந்த இயக்குநருக்கு நேரில் அஞ்சலி செலுத்திய நடிகை ராதிகா சரத்குமார், அங்கு நிலவிய குழப்பமான சூழலால் பாக்யராஜ் உடலுக்கு நிம்மதியாக ஒரு இறுதி அஞ்சலி கூட செலுத்த முடியவில்லை என்று தனது ஆழ்ந்த வருத்தத்தை அறிக்கையாக வெளியிட்டுள்ளார். 50 ஆண்டுகால நெருங்கிய நண்பரை இழந்து தவிக்கும் சூழலில், அங்கு நிலவிய அமைதியற்ற சூழல் மனதிற்கு மிகுந்த வேதனையை அளித்ததாக அவர் குறிப்பிட்டுள்ளார்.
சமூக வலைதளங்களின் தாக்கத்தால், யார் முந்திச் சென்று செய்திகளை வெளியிடுவது மற்றும் அதிகப் பார்வையாளர்களைக் கவர்வது என்ற போட்டி இன்று அதிகரித்துள்ளது என்று ராதிகா சுட்டிக்காட்டியுள்ளார். இறுதி அஞ்சலி செலுத்துவோரின் அழுகையையும், சோகத்தையும் ‘ஜூம்’ (Zoom) செய்து காட்டி பரபரப்பு ஊட்ட நினைக்கும் ஊடகங்களின் செயல், மனிதர்களின் யதார்த்தமான உணர்வுகளை மதிக்கத் தவறிய ஒழுக்கமற்ற சமூகத்தை உருவாக்குவதாக அவர் சாடியுள்ளார். இதுபோன்ற விரும்பத்தகாத அத்துமீறல்கள் தமிழர்களின் பண்பாட்டிற்கும் வாழ்வியலுக்கும் நல்லதல்ல என்றும் அவர் எச்சரித்துள்ளார்.
இனிவரும் காலங்களில் துக்க நிகழ்வுகள் நடக்கும் இடங்களில் கண்ணியமும் மரியாதையும் காக்கப்பட வேண்டும் என்று ராதிகா கோரிக்கை விடுத்துள்ளார். இதற்காக தமிழக அரசும், திரைத்துறையும் இணைந்து முறையான வழிகாட்டு நெறிமுறைகளை வகுத்து நடைமுறைப்படுத்த வேண்டும் என அவர் வலியுறுத்தியுள்ளார். இறுதி அஞ்சலி செலுத்தும் இடங்களிலாவது ஊடகங்கள் சுய கட்டுப்பாட்டையும் ஒழுக்கத்தையும் கடைப்பிடிக்க வேண்டும் என்பதே ஒட்டுமொத்த திரையுலகினரின் எதிர்பார்ப்பாக உள்ளது.