பீகார் மாநிலம் வைஷாலி மாவட்டத்தில், காவல்துறை சீருடையைத் தவறாகப் பயன்படுத்திய இளைஞர் ஒருவரின் செயல் பெரும் சர்ச்சையை ஏற்படுத்தியுள்ளது. சஹாதேய் புசுர்க் காவல் நிலையத்தில் பணிபுரியும் காவலர் விபின் பஸ்வான் என்பவரின் மகன் ரோஷன் குமார், தனது தந்தையின் அதிகாரப்பூர்வ சீருடையை அணிந்து போஜ்புரி பாடலுக்கு ரீல்ஸ் செய்து சமூக ஊடகங்களில் பதிவிட்டுள்ளார். இந்த வீடியோவில் காவல் நிலைய ரோந்து வாகனமும் பின்னணியில் தெரிவதுடன், அவர் தனது தந்தையின் அதிகாரத்தைப் பயன்படுத்துவது போன்ற தோற்றத்தை ஏற்படுத்தியது பொதுமக்களிடையே அதிர்ச்சியை ஏற்படுத்தியுள்ளது.
சமூக ஊடகங்களில் காவல்துறை அதிகாரிகள் ரீல்ஸ் எடுப்பதற்கு பீகார் மாநில காவல்துறை தலைமையகம் ஏற்கனவே கடுமையான தடைகளை விதித்துள்ளது. சீருடையின் மாண்பைக் குலைக்கும் வகையில் செயல்படுபவர்கள் மீது கடும் நடவடிக்கை எடுக்கப்படும் என அனைத்து மாவட்ட கண்காணிப்பாளர்களுக்கும் உத்தரவிடப்பட்டிருந்தது. இத்தகைய சூழலில், ஒரு காவலரின் மகனே விதிகளுக்குப் புறம்பாகச் சீருடையை அணிந்து வீடியோ வெளியிட்டிருப்பது, தலைமையகத்தின் உத்தரவுகள் கீழ் மட்டங்களில் முறையாகப் பின்பற்றப்படுகிறதா என்கிற கேள்வியை எழுப்பியுள்ளது.
இந்த விவகாரம் வைரலானதைத் தொடர்ந்து, வைஷாலி காவல்துறை உடனடியாக விசாரணையில் இறங்கியது. அரசு சீருடையைச் சட்டவிரோதமாகப் பயன்படுத்தியது மற்றும் காவல்துறையின் நற்பெயருக்குக் களங்கம் விளைவித்தது ஆகிய காரணங்களுக்காக ரோஷன் குமார் மீது முதல் தகவல் அறிக்கை (FIR) பதிவு செய்யப்பட்டுள்ளது. தற்போது தலைமறைவாக உள்ள இளைஞரைக் கைது செய்யத் தீவிர நடவடிக்கைகள் மேற்கொள்ளப்பட்டு வருவதோடு, பணியில் கவனக்குறைவாக இருந்த காவலர் விபின் பஸ்வான் மீதும் துறை ரீதியான விசாரணை தொடங்கப்பட்டுள்ளது.