இன்றைய அவசர காலத்தில் சமையல் நேரத்தைக் குறைக்கப் பயன்படும் ரெடிமேட் சப்பாத்தி மற்றும் ஃபிரோசன் பரோட்டா பாக்கெட்டுகள் பல நோய்களுக்கு வழிவகுக்கின்றன. இவை கெட்டுப்போகாமல் இருக்கவும் மென்மையாக இருக்கவும் சேர்க்கப்படும் மலிவான பாமாயில் மற்றும் மார்கரின் செயற்கை வெண்ணெய்யில் ஆபத்தான ‘டிரான்ஸ் ஃபேட்’ உள்ளது. உணவில் தினமும் சிறிதளவு டிரான்ஸ் ஃபேட் சேர்ந்தால் கூட, ரத்தக்குழாய் அடைப்பு ஏற்பட்டு மாரடைப்பு வரும் அபாயம் 23 சதவீதம் அதிகரிப்பதாக உலக சுகாதார நிறுவனம் எச்சரித்துள்ளது.
குளிரூட்டப்பட்ட நிலையில் இருக்கும் சப்பாத்தியை வெளியில் எடுத்துச் சூடுபடுத்தும் முன், சாதாரண வெப்பநிலையில் வைக்கும்போது ஈ-கோலை போன்ற கிருமிகள் வேகமாகப் பெருகித் தீவிர வயிற்றுப்போக்கு, வாந்தி, குடல் புண்ணை உண்டாக்குகின்றன. மேலும், மாவு பூசணம் பிடிக்காமல் இருக்கச் சேர்க்கப்படும் ‘கால்சியம் புரோப்பியோனேட்’ போன்ற கெமிக்கல்களால் தோலில் அரிப்பு, அலர்ஜி மற்றும் குழந்தைகளுக்குக் கடுமையான ஒற்றைத் தலைவலி ஏற்படுவதாக ஆய்வுகள் தெரிவிக்கின்றன.
100% கோதுமை என்று விளம்பரம் செய்யப்பட்டாலும், மாவு மிருதுவாக இருக்க மைதாவும் சமையல் சோடாவும் மறைமுகமாகச் சேர்க்கப்படுகின்றன. இதனால் நார்ச்சத்து அழிந்து ரத்தத்தில் சர்க்கரை அளவு உயர்ந்து, இளம் வயதிலேயே சர்க்கரை நோய் மற்றும் உடல் பருமன் ஏற்படும் அபாயம் உருவாகிறது. எனவே, 10 நிமிட சமையல் எளிதாக இருக்கிறது என்பதற்காக உடலைக் கெடுத்துக் கொள்ளாமல், வீடுகளிலேயே மாவு பிசைந்து சமைப்பதே குடும்ப ஆரோக்கியத்திற்குப் பாதுகாப்பானது.