ஹாயாக புகைபிடித்த திரிணாமுல் காங்கிரஸ் எம்.பி… நாடாளுமன்றத்தில் இப்படியா…? வலுக்கும் கண்டனம்…!!

நாடாளுமன்றக் கூட்டத்தொடர் நடைபெற்றுக் கொண்டிருந்த வேளையில், திரிணாமுல் காங்கிரஸ் கட்சியின் நாடாளுமன்ற உறுப்பினர் கீர்த்தி ஆசாத் மக்களவைக்குள்ளேயே மின்னணு சிகரெட் பயன்படுத்தியதாகப் பெரும் சர்ச்சை எழுந்துள்ளது. இது தொடர்பான காணொளியைப் பாஜகவின் தகவல் தொழில்நுட்பப் பிரிவு சமூக வலைதளங்களில் வெளியிட்டுள்ள நிலையில், எதிர்க்கட்சி உறுப்பினரின் இத்தகைய ஒழுங்கீனமான செயல் நாடாளுமன்றத்தின் மாண்பைச் சிதைப்பதாகப் பாஜக குற்றம் சாட்டியுள்ளது. மக்கள் பிரதிநிதிகள் சட்டத்தை மதிப்பதில் முன்மாதிரியாக இருக்க வேண்டும் எனப் பலரும் கண்டனம் தெரிவித்து வருகின்றனர்.

பாஜகவின் மூத்த உறுப்பினர் அனுராக் தாக்கூர், இந்த விதிமீறல் தொடர்பாகச் சபாநாயகர் ஓம் பிர்லாவிடம் முறைப்படி எழுத்துப்பூர்வமான புகாரை அளித்துள்ளார். இந்தியாவில் 2019-ஆம் ஆண்டு முதல் இ-சிகரெட்டுகளுக்கு முழுமையான தடை விதிக்கப்பட்டுள்ள சூழலில், நாட்டின் உயரிய அவையிலேயே இந்தச் சட்டம் மீறப்பட்டது குறித்துத் தீவிர விசாரணை நடத்தக் கோரிக்கை விடுக்கப்பட்டுள்ளது. அவையில் உள்ள கண்காணிப்பு கேமரா பதிவுகளை ஆய்வு செய்த பிறகு, உண்மைத்தன்மையின் அடிப்படையில் உரிய ஒழுங்கு நடவடிக்கை எடுக்கப்படும் என எதிர்பார்க்கப்படுகிறது.

நாடாளுமன்றத்தின் விதிகள் அனைவருக்கும் பொதுவானவை என்றும், திரிணாமுல் காங்கிரஸ் கட்சியின் இத்தகைய போக்கு கண்டிக்கத்தக்கது என்றும் பாஜக விமர்சித்துள்ளது. இந்த விவகாரத்தில் மம்தா பானர்ஜி தலையிட்டு விளக்கம் அளிக்க வேண்டும் என வலியுறுத்தப்பட்டுள்ளது.