72வது தேசிய விருதுகள்… மொத்த இந்திய சினிமாவையும் அலறவிட்ட கோலிவுட்… பாலிவுட்டை ஓரங்கட்டிய அமரன், ராயன்…!

டெல்லியில் அறிவிக்கப்பட்ட 72வது தேசியத் திரைப்பட விருதுகளில் தமிழ் திரையுலகம் (கோலிவுட்) மிக பிரம்மாண்டமான சாதனையைப் படைத்துள்ளது. புகழ்பெற்ற மலையாள இயக்குனர் ஜெயராஜ் தலைமையிலான 11 பேர் கொண்ட நடுவர் குழு, கடந்த 2024 ஆம் ஆண்டு சென்சார் செய்யப்பட்ட திரைப்படங்களை ஆய்வு செய்து இந்த விருது பட்டியலை வெளியிட்டுள்ளது. இதில் தமிழ் சினிமாவின் முன்னணிப் படைப்புகள் பல உயரிய பிரிவுகளில் விருதுகளைக் குவித்து ஒட்டுமொத்த இந்தியத் திரையுலகின் கவனத்தையும் தன் பக்கம் ஈர்த்துள்ளன.

குறிப்பாக, உலகநாயகன் கமல் ஹாசன் தயாரிப்பில் சிவகார்த்திகேயன் நடித்து வெளியான ‘அமரன்’ திரைப்படம் இந்த விருது விழாவில் பெரும் ஆதிக்கத்தை செலுத்தியுள்ளது. இப்படத்திற்காக ராஜ்குமார் பெரியசாமி சிறந்த இயக்குனராகவும், ஆர். கலைவாணன் சிறந்த எடிட்டராகவும், ஜி.வி. பிரகாஷ் குமார் சிறந்த பின்னணி இசை அமைப்பாளராகவும் தேர்வாகி சாதனை படைத்துள்ளனர். மேலும், தனுஷ் இயக்கி நடித்த ‘ராயன்’ திரைப்படம் சிறந்த தமிழ் படமாகவும், தனுஷின் ‘கேப்டன் மில்லர்’ சமூக விழுமியங்களை ஊக்குவிக்கும் சிறந்த படமாகவும் தேர்வாகி தமிழ் சினிமாவிற்கு பெருமை சேர்த்துள்ளன.

இவர்களுடன் ‘மகாராஜா’ படத்தில் நடித்த சச்சனா நமிதாஸ் சிறந்த துணை நடிகைக்கான விருதை (பகிர்வு) வென்றுள்ளார். ‘மெய்யழகன்’ படத்தின் சவுண்ட் மிக்ஸ் இன்ஜினியர் சுரேன் ஜி சிறப்புச் சான்றையும் பெற்றுள்ளார். ஃபீச்சர் படங்கள் மட்டுமின்றி, நான்-ஃபீச்சர் பிரிவிலும் ‘புளூ’ படத்திற்காக டி.எஸ். ஹரிஹரசுதனுக்கு சிறந்த சவுண்ட் டிசைன் விருதும், ‘லைஃப் இன் லூம்’ ஆவணப்படத்திற்காக எட்மண்ட் ரான்சனுக்கு சிறந்த ஒளிப்பதிவு விருதும் கிடைத்துள்ளன. ஒட்டுமொத்தமாக கோலிவுட் படைப்பாளிகளின் திறமைக்குக் கிடைத்த இந்த உயரிய அங்கீகாரம் தமிழ் ரசிகர்களைக் கொண்டாட வைத்துள்ளது.