ஏலே டிரம்பே இப்படி சாச்சிப்புட்டியே…. “எங்க எல்லைக்குள் வந்தா அவ்வளவுதான்…. ஹார்முஸ் நீரிணை இனி அமெரிக்காவுக்கே சொந்தம்”…. ஹார்முஸ் நீரிணை இனி அமெரிக்காவுக்கே சொந்தம்…!

அமெரிக்க அதிபர் ட்ரம்ப், ஈரான் எந்த சூழ்நிலையிலும் அணு ஆயுதங்களை வைத்திருக்க முடியாது என்றும், அதை அனுமதிக்கப்போவதில்லை என்றும் மீண்டும் உறுதியாகத் தெரிவித்துள்ளார். வெள்ளை மாளிகையில் செய்தியாளர்களிடம் பேசிய அவர், ஈரான் அமெரிக்காவுடன் ஒரு ஒப்பந்தத்தை எட்ட விரும்புவதாகக் குறிப்பிட்டார். இருப்பினும், அணு ஆயுதப் போரை நடத்தும் திறனை ஈரான் பெறுவதைத் தடுக்கும் வகையில் அமெரிக்கா முன்வைக்கும் கண்டிப்பான நிபந்தனைகளுக்கு ஈரானிய தரப்பு இன்னும் உடன்படவில்லை என்பதை அவர் தெளிவுபடுத்தியுள்ளார்.

ஹார்முஸ் நீரிணையின் கட்டுப்பாட்டை அமெரிக்கக் கடற்படை முற்றுகையின் மூலம் தங்கள் வசம் வைத்துள்ளதாக ட்ரம்ப் சுட்டிக்காட்டினார். அனைத்து ஈரானிய துறைமுகங்களையும் அமெரிக்கப் படைகள் முற்றுகையிட்டுள்ளதால், அந்த முக்கிய நீர்வழிப்பாதையின் மீது முழுமையான அதிகாரம் அமெரிக்காவிடமே உள்ளது என்று அவர் கூறினார். மேலும், அந்தப் பகுதியை அமெரிக்காவின் பிராந்தியமாக அறிவிக்கும் யோசனை தமக்கு உகந்ததாக இருப்பதாகக் கூறிய அவர், கடல்சார் பாதுகாப்பில் அமெரிக்காவின் வலுவான கரங்களை வெளிப்படுத்தினார்.

இதேவேளையில், ஓமன் நாட்டின் நடவடிக்கைகள் குறித்தும் ட்ரம்ப் தனது அதிருப்தியை வெளிப்படுத்தினார். ஹார்முஸ் நீரிணையைத் திறந்து வைத்து, அதன் கட்டுப்பாட்டை இரு நாடுகளின் கைகளிலும் பகிர்ந்து கொள்ளும் வகையில் ஓமன் ஈரானுடன் இணைந்து செயல்படுவதாகக் கூறப்படும் தகவல்களுக்கு மத்தியில் இந்த அறிக்கை வெளியாகியுள்ளது. ஓமன் சரியாக நடந்துகொள்ளவில்லை என்று தெரிவித்த ட்ரம்ப், மற்ற நாடுகளைக் கையாள்வதைப் போலவே ஓமனையும் அமெரிக்காவால் மிக எளிதாகக் கையாள முடியும் என்று எச்சரிக்கும் தொனியில் பேசினார்.

இரு நாடுகளுக்கும் இடையே அறிவிக்கப்பட்டிருந்த 60 நாள் காலக்கெடு நேற்றுடன் முடிவடைந்த போதிலும், அணுசக்தித் திட்டம் மற்றும் ஹார்முஸ் நீரிணை தொடர்பான இரு தரப்பின் நிலைப்பாடுகளிலும் எந்த பெரிய மாற்றமும் ஏற்படவில்லை. இதனிடையே, ஃபாக்ஸ் நியூஸுக்கு அளித்த பேட்டியில், ஈரான் இஸ்லாமிய புரட்சிகர பாதுகாப்புப் படையுடன் (IRGC) ரகசியப் பேச்சுவார்த்தைகள் நடப்பதாக ட்ரம்ப் குறிப்பிட்டிருந்தார். ஆனால், இக்கூற்றை முற்றிலுமாக மறுத்துள்ள IRGC செய்தித் தொடர்பாளர் ஹொசைன் மொஹெப்பி, அமெரிக்காவுடன் எந்தவித மறைமுக அல்லது நேரடியாக வழியிலான பேச்சுவார்த்தையும் நடைபெறவில்லை என்று திட்டவட்டமாகத் தெரிவித்துள்ளார்.