“தப்பா கேட்டுட்டீங்களே… நாளைக்கு அண்ணனை கவனிச்சிக்கோங்க”…. சட்டசபையில் கலகலப்பை ஏற்படுத்திய அமைச்சர் ஆதவ் அர்ஜுனா…!

தமிழக சட்டப்பேரவையில் இன்று நடைபெற்ற பொதுப்பணித் துறை மற்றும் இளைஞர் நலன், விளையாட்டு மேம்பாட்டுத் துறை மீதான மானியக் கோரிக்கை விவாதத்தின் போது சுவாரசியமான நிகழ்வு ஒன்று அரங்கேறியது. விக்கிரவாண்டி தொகுதியின் பாமக எம்.எல்.ஏ சிவக்குமார் பேசுகையில், 1952-ஆம் ஆண்டு முதல் நிலுவையில் இருக்கும் வரலாற்றுச் சிறப்புமிக்க ‘நந்தன் கால்வாய் திட்டத்தை’ விரைந்து நிறைவேற்ற வேண்டும் என்றும், 2024-ஆம் ஆண்டு ‘ஃபெங்கல்’ புயலால் பாதிக்கப்பட்ட ஏரிகளைச் சீரமைக்க வேண்டும் என்றும் கோரிக்கை வைத்தார். மேலும், பாமக தலைவர் அன்புமணி ராமதாஸுக்கு 3 வயதாக இருக்கும் போது தொடங்கப்பட்ட இந்தப் பேச்சு, இன்று அவருக்கு 57 வயதாகும் வரை நீடிப்பதாகவும், விக்கிரவாண்டியைத் தனி கோட்டாட்சியாகப் பிரிக்க வேண்டும் என்பது உள்ளிட்ட பல்வேறு உள்ளூர் கோரிக்கைகளையும் அவையில் முன்வைத்தார்.

அப்போது குறுக்கிட்டுப் பேசிய அமைச்சர் ஆதவ் அர்ஜுனா, புன்னகையுடனே பதிலளித்து அவையில் சிரிப்பலையை ஏற்படுத்தினார். “நீர் வளத் துறை மீதான மானியக் கோரிக்கை விவாதம் நாளைதான் நடைபெற உள்ளது. ஆனால், உறுப்பினர் சிவக்குமார் நாளைய தினம் அமைச்சர் ஆனந்திடம் கேட்க வேண்டிய நீர் பாசனம் தொடர்பான கேள்விகளை எல்லாம், இன்றே பொதுப்பணித் துறை அமைச்சரான என்னிடம் கேட்டுக்கொண்டிருக்கிறார். எனவே நாளை நீர் வளத் துறை விவாதத்தின் போது அண்ணனை கவனித்துக் கொள்ளுங்கள்” என்று நகைச்சுவையாகக் குறிப்பிட்டார். இதற்குப் பதிலளித்த எம்.எல்.ஏ சிவக்குமார், நாளைக்குத்தான் அந்த விவாதம் என்றாலும் முன்னெச்சரிக்கையாக இன்றே கோரிக்கையைப் பதிவு செய்துவிடுகிறேன் எனக் கூறியதால் அவையில் மீண்டும் சிரிப்பொலி எழுந்தது.

இதனைத் தொடர்ந்து நடைபெற்ற விவாதத்தில், முன்னாள் அமைச்சர் எம்.ஆர்.கே. பன்னீர்செல்வம் குறுக்கிட்டுப் பேசுகையில், நந்தன் கால்வாய் திட்டத்திற்கு முந்தைய ஆட்சியிலேயே நிதி ஒதுக்கப்பட்டுவிட்டது என்றும், உறுப்பினர் சிவக்குமார் அப்போது மயிலம் தொகுதி எம்.எல்.ஏ-வாக இருந்ததால் அவருக்கு இது தெரிந்திருக்க வாய்ப்பில்லை என்றும் தெரிவித்தார். இதற்கு உடனடியாக மறுப்பு தெரிவித்து எழுந்த சி.வி.சண்முகம், இத்திட்டத்திற்கு எவ்வித நிதியும் ஒதுக்கப்படாமல் தொடர்ந்து கிடப்பிலேயே போடப்பட்டுள்ளது என்று வாதிட்டார். இவ்வாறு அமைசரின் நகைச்சுவையான பதிலினாலும், அதைத் தொடர்ந்து எழுந்த காட்டமான அரசியல் விவாதங்களினாலும் இன்றைய சட்டமன்றக் கூட்டத்தொடர் களைகட்டியது.