உத்தரகாண்ட் மாநிலத்தைச் சேர்ந்த பைக்கர் மற்றும் சமூக ஊடக பதிவரான ரோகன் குமார் மண்டல், கேரளாவின் கொச்சி நகரச் சாலைகளில் பயணம் செய்தபோது எடுத்த வீடியோ ஒன்று இணையத்தில் வைரலாகி வருகிறது. கேரள மாநிலம் உயர்கல்வி மற்றும் இயற்கை அழகுக்கு மட்டுமின்றி, போக்குவரத்து விதிகளைப் பின்பற்றுவதிலும் ஒட்டுமொத்த நாட்டிற்கே முன்மாதிரியாகத் திகழ்கிறது என்பதை இந்த வீடியோ பிரதிபலிக்கிறது. கொச்சி சாலைகளில் பயணிக்கும் இருசக்கர வாகன ஓட்டிகள் அனைவரும் கட்டாயம் ஹெல்மெட் அணிந்திருப்பதை அவர் வியப்புடன் கவனித்துப் பதிவிட்டுள்ளார்.
அங்குள்ள மக்கள் ஹெல்மெட்டை வெறும் சட்டக் கடமையாகவோ அல்லது அபராதத்திற்குப் பயந்தோ அணியாமல், தங்களின் சொந்தப் பாதுகாப்பிற்காகவே அணிகிறார்கள் என்று ரோகன் குறிப்பிட்டுள்ளார். மேலும், அவர்கள் சாதாரண ஹெல்மெட்டுகளைப் பயன்படுத்தாமல், உயர்தரமான ஹெல்மெட்டுகளையே அதிகம் பயன்படுத்துகின்றனர். சாலையில் சென்ற பல இளைஞர்கள் ₹5,000 முதல் ₹25,000 வரை மதிப்புள்ள விலையுயர்ந்த, பாதுகாப்புத் திறன்மிக்க ஹெல்மெட்டுகளை அணிந்திருந்ததைக் கண்டு அவர் ஆச்சரியமடைந்துள்ளார்.
https://www.instagram.com/reel/DZMuyC9RiwB/?utm_source=ig_web_button_share_sheet
கேரள மக்களின் இந்த பொறுப்பான வாழ்க்கை முறையையும், சாலைப் பாதுகாப்பு விழிப்புணர்வையும் பாராட்டி ரோகன் குமார் மண்டல் தனது இன்ஸ்டாகிராம் பக்கத்தில் இந்த வீடியோவைப் பகிர்ந்துள்ளார். “கேரள மக்கள் ஹெல்மெட் விஷயத்தில் செம கிரேஸியாக இருக்கிறார்கள்” என்று அவர் நகைச்சுவையாகக் கூறினாலும், அவர்களின் இந்த ஒழுக்கமான செயல் சமூக ஊடகங்களில் பெரும் வரவேற்பைப் பெற்றுள்ளது. பல நெட்டிசன்கள் கேரள மக்களின் இந்த பொறுப்புணர்வைப் பாராட்டி தங்களது கருத்துகளைப் பகிர்ந்து வருகின்றனர்.