ஹரியானாவின் யமுனா நகர் பகுதியில், தனது காதலுக்கு எதிர்ப்பு தெரிவித்த தாயை லண்டனில் இருந்து ரகசியமாக வந்து மகன் கொலை செய்த சம்பவம் பெரும் அதிர்ச்சியை ஏற்படுத்தியுள்ளது. கோமித் ரதி எனும் இளைஞர் வேறு ஜாதியைச் சேர்ந்த பெண்ணைக் காதலித்ததை அவரது தாய் பல்ஜீந்தர் கவுர் கடுமையாக எதிர்த்துள்ளார். இதனால் ஏற்பட்ட மோதலைத் தொடர்ந்து, சமரசம் செய்ய முயன்ற உறவினர்கள் கோமித்தை லண்டனுக்குப் படிக்க அனுப்பி வைத்தனர். ஆனால், தாயின் மீதான ஆத்திரம் குறையாத கோமித், அவரைத் தீர்த்துக்கட்டத் திட்டமிட்டு யாருக்கும் தெரியாமல் இந்தியா திரும்பினார்.
தனது வருகையை நண்பர் பங்கஜிடம் மட்டுமே பகிர்ந்துகொண்ட கோமித், கடந்த டிசம்பர் 24-ஆம் தேதி இரவு வீட்டின் மாட்டுத் தொழுவத்தில் பதுங்கியிருந்தார். அங்கு வந்த தனது தாயை ஆவேசமாகத் தாக்கி கொலை செய்ததோடு, விபத்து போலக் காட்ட உடலைத் தண்ணீர் தொட்டியில் தள்ளிவிட்டுத் தப்பியோடினார். ஆரம்பத்தில் மர்ம மரணமாகக் கருதப்பட்ட இந்த வழக்கை கிரைம் பிரிவு போலீசார் கையில் எடுத்து, செல்போன் சிக்னல் மற்றும் நவீன தொழில்நுட்ப உதவியுடன் கொலையாளியைக் கண்டுபிடித்தனர். தற்போது கோமித் மற்றும் அவரது நண்பர் இருவரும் கைது செய்யப்பட்டு சிறையில் அடைக்கப்பட்டுள்ளனர்.