“பணிநீக்கம் செய்த கையோடு போன் செய்த மேலாளர்”… உள்ளே நடந்த ட்விஸ்ட் இதுதான்.. வைரலாகும் மென்பொருள் பொறியாளரின் பதிவு..!!!

தகவல் தொழில்நுட்பத் துறையில் நிலவும் கடும் சவால்களை விளக்கும் வகையில், மொஹாலியைச் சேர்ந்த ஒரு மென்பொருள் பொறியாளர் பகிர்ந்துள்ள செய்தி சமூக வலைதளங்களில் பெரும் விவாதத்தை ஏற்படுத்தியுள்ளது. கடந்த மார்ச் 31-ம் தேதியன்று, போதிய திட்டங்கள் இல்லை எனக் கூறி சுமார் 20 பேர் கொண்ட குழுவை ஒரு நிறுவனம் திடீரென பணிநீக்கம் செய்தது.

இதனால் அன்றே கடைசி வேலை நாள் என்றும், அந்த மாதத்திற்கான முழு சம்பளம் வழங்கப்படாது என்றும் ஊழியர்களிடம் தெரிவிக்கப்பட்டது. ஆனால், அந்த அதிர்ச்சியிலிருந்து மீள்வதற்குள், பணிநீக்கம் செய்யப்பட்ட அதே ஊழியர்களில் ஒருவருக்கு அந்த நிறுவனமே ஒரு வினோதமான வாய்ப்பை வழங்கியுள்ளது.

மேலும் அவருக்கு மட்டும் தனியாக அழைப்பு விடுத்த மேலாளர், வீட்டிலிருந்தே வேலை செய்யும் முறையில் மாதம் 25,000 ரூபாய் சம்பளத்திற்கு மீண்டும் பணியில் சேருமாறு கூறியுள்ளார். இது அவரது முந்தைய சம்பளமான 23,000 ரூபாயை விட சற்று அதிகம் என்றாலும், இதற்கு முன் 20 பேர் செய்து வந்த முழு-அடுக்கு மேம்பாடு மற்றும் மொபைல் செயலிகள் உருவாக்கம் போன்ற அனைத்து வேலைகளையும் அவர் ஒருவராகவே கவனிக்க வேண்டும் என்ற நிபந்தனை விதிக்கப்பட்டுள்ளது.

இந்நிலையில் பணிச்சுமை அதிகம் என அவர் தயங்கினாலும், வெறும் 8 மாத அனுபவம் மட்டுமே கொண்ட தமக்கு தற்போதைய கடினமான வேலைச் சந்தையில் வேறு வாய்ப்புகள் கிடைப்பது கடினம் என்பதால், தற்காலிகமாக அந்தச் சலுகையை ஏற்றுக்கொண்டதாக அவர் தெரிவித்துள்ளார். எனினும், முறையான பணி நியமனக் கடிதம் இல்லாமல் இத்தகைய வாய்மொழி வாக்குறுதிகளை நம்ப வேண்டாம் என இணையவாசிகள் அவருக்கு எச்சரிக்கை விடுத்து வருகின்றனர்.