கேரளா மாநிலம் மலப்புரம் மாவட்டத்தைச் சேர்ந்த 55 வயதான தனலட்சுமி என்ற நடன ஆசிரியைக்கும், அதே மாவட்டத்தின் தேஞ்சிப்பலம் பகுதியைச் சேர்ந்த 39 வயதான விக்னேஷ் என்பவருக்கும் இடையே ரகசிய உறவு இருந்து வந்துள்ளது. திருமணமாகி இரண்டு குழந்தைகளுக்குத் தாயான தனலட்சுமி, கடந்த 4ஆம் தேதியன்று நடன நிகழ்ச்சி ஒன்றில் பங்கேற்கப் போவதாக தனது வீட்டில் பொய்யான தகவலைத் தெரிவித்துவிட்டு, விக்னேஷுடன் திருச்சூர் புறப்பட்டுச் சென்றார். அங்குள்ள செருதுருத்தி பகுதியில் அமைந்திருக்கும் ஒரு தனியார் தங்கும் விடுதியில் இருவரும் அறை எடுத்துத் தங்கியுள்ளனர்.
அந்த விடுதி அறையில் மதுபோதையில் இருந்த விக்னேஷிடம், தன்னை உடனடியாகத் திருமணம் செய்து கொள்ளும்படி தனலட்சுமி தொடர்ந்து வலியுறுத்தியுள்ளார். அதற்கு விக்னேஷ், சில மாதங்கள் பொறுத்திருக்குமாறும் அதன் பிறகு திருமணம் செய்து கொள்ளலாம் எனவும் பதிலளித்துள்ளார். இதை ஏற்க மறுத்த தனலட்சுமிக்கும் அவருக்கும் இடையே கடும் வாக்குவாதம் ஏற்பட்டுள்ளது. இந்தத் தகராறின் உச்சகட்டமாக, ஆத்திரமடைந்த விக்னேஷ் தனலட்சுமியின் கழுத்தை நெரித்துக் கொடூரமாகக் கொலை செய்துள்ளார். பின்னர், தனது குற்றத்தை மறைப்பதற்காக அறையை வெளிப்புறமாகப் பூட்டிவிட்டு அங்கிருந்து தப்பி தனது சொந்த ஊருக்குச் சென்றுவிட்டார்.
கொலையைச் செய்த பதற்றத்தில் ஊருக்குத் திரும்பிய விக்னேஷ், விடுதியில் நடந்த சம்பவங்கள் அனைத்தையும் தனது சகோதரியிடம் தெரிவித்துள்ளார். சகோதரியின் அறிவுரையை ஏற்று, தேஞ்சிப்பலம் காவல் நிலையத்தில் அவர் தாமாகவே முன்வந்து சரணடைந்ததுடன் குற்றத்தையும் ஒப்புக்கொண்டார். அவர் அளித்த தகவலின் அடிப்படையில் விரைந்து செயல்பட்ட செருதுருத்தி காவல்துறையினர், விடுதி அறையின் கதவை உடைத்து தனலட்சுமியின் உடலை மீட்டனர். பின்னர், உடற்கூறாய்வுக்காக திருச்சூர் அரசு மருத்துவமனைக்கு உடலை அனுப்பி வைத்த போலீசார், விக்னேஷை முறைப்படி கைது செய்து மேல் நடவடிக்கைகளை மேற்கொண்டு வருகின்றனர்.