ராணிப்பேட்டை மாவட்டம் வாலாஜாபேட்டையில் சுமார் 50 ஆயிரம் ரூபாய் மதிப்பிலான போதை மாத்திரைகளை விற்பனை செய்ய முயன்ற பெண் மற்றும் வாலிபரை காவல்துறையினர் கைது செய்துள்ளனர். வாலாஜாபேட்டை மதுவிலக்கு அமலாக்கப் பிரிவு போலீசார் சென்னை-பெங்களூரு தேசிய நெடுஞ்சாலையில் வாகன சோதனையில் ஈடுபட்டிருந்தபோது, சந்தேகத்திற்கிடமான முறையில் வந்த பெண் மற்றும் இளைஞரை பிடித்து விசாரணை நடத்தினர்.
மேலும் அவர்கள் முன்னுக்குப் பின் முரணாகப் பேசியதால், காவல் நிலையம் அழைத்துச் சென்று சோதனை செய்ததில், அவர்களிடம் விற்பனைக்காக வைக்கப்பட்டிருந்த 908 போதை மாத்திரைகள் பறிமுதல் செய்யப்பட்டன. காவல்துறையினரின் முதற்கட்ட விசாரணையில், கைது செய்யப்பட்டவர்கள் வாலாஜாபேட்டையைச் சேர்ந்த சுபாஷினி மற்றும் தேவதானம் பகுதியைச் சேர்ந்த சுந்தர் என்பது தெரியவந்தது.
இந்நிலையில் வேலூர் பகுதியிலிருந்து போதை மாத்திரைகளை வாங்கி வந்து இவர்கள் விற்பனை செய்ய முயன்றது கண்டுபிடிக்கப்பட்டது. குறிப்பாக, சுபாஷினியின் மகனும், சுந்தரின் சகோதரரும் ஏற்கனவே போதை மாத்திரை வழக்குகளில் கைதாகி சிறையில் இருப்பது குறிப்பிடத்தக்கது. தற்போது கைது செய்யப்பட்ட இருவர் மீதும் வழக்குப்பதிவு செய்த போலீசார், அவர்களை வேலூர் மத்திய சிறையில் அடைத்து மேல் விசாரணை நடத்தி வருகின்றனர்.