தவெக கொடுத்த 10 அமைச்சர் பதவி… இபிஎஸ் பண்ண தப்பு… முன்னாள் அமைச்சர் வீரமணியின் பகீர் வாக்குமூலத்தால் அதிரும் அதிமுக..!!

தமிழகத்தில் புதிதாகப் பொறுப்பேற்றுள்ள விஜய் தலைமையிலான தவெக அரசுக்கு, அதிமுக வெளியில் இருந்து ஆதரவு தரலாம் என்று தாம் முன்மொழிந்ததாக முன்னாள் அமைச்சர் கே.சி.வீரமணி தெரிவித்துள்ளார். ஆனால், அதிமுக பொதுச்செயலாளர் எடப்பாடி பழனிசாமி இந்த யோசனையை ஏற்க மறுத்துவிட்டதாக அவர் குறிப்பிட்டுள்ளார். மேலும், கூட்டணி பேச்சுவார்த்தையின்போது தவெக தரப்பில் அதிமுகவிற்கு 10 அமைச்சர் பதவிகள் தருவதாகக் கூறப்பட்டதாகவும், நாமும் ஆட்சியில் அமைச்சராகப் பங்கெடுத்தால் நன்றாக இருக்கும் என இபிஎஸ்ஸிடம் தாம் நேரில் எடுத்துரைத்ததாகவும் வீரமணி வெளிப்படையாகக் கூறியுள்ளார்.

அதிமுகவில் தற்போது நிர்வாகிகளுக்கு இடையே அதிரடி நீக்கங்களும், உட்கட்சிப் பூசல்களும் அரங்கேறி வரும் பரபரப்பான அரசியல் சூழ்நிலையில், முன்னாள் அமைச்சரின் இந்த தவெக ஆதரவுப் பேட்டி பெரும் அதிர்வலைகளை ஏற்படுத்தியுள்ளது. தவெக அரசு அமைந்த பிறகு இரண்டு கட்சிகளுக்கும் இடையே திரைமறைவில் நடந்த ஆட்சிப் பகிர்வு மற்றும் கூட்டணிப் பேச்சுவார்த்தைகள் இதன் மூலம் வெளிச்சத்திற்கு வந்துள்ளன. கே.சி.வீரமணியின் இந்த அதிரடிப் பேட்டிக்கு அதிமுக தலைமை என்ன மாதிரியான நடவடிக்கை எடுக்கப்போகிறது என்ற எதிர்பார்ப்பு அரசியல் வட்டாரத்தில் தொற்றிக்கொண்டுள்ளது.