ஆனேக்கல் தாலுகாவைச் சேர்ந்த கும்பரணஹள்ளி பகுதியில் அமைந்துள்ள ‘செலிபிரிட்டி ஈக்கோ ஃப்ரண்ட்’ குடியிருப்பில், கடந்த சனிக்கிழமை நள்ளிரவு வேளையில் ‘சட்டி கேங்’ என்றழைக்கப்படும் மர்ம நபர்கள் திருட முயன்ற சம்பவம் பெரும் பரபரப்பை ஏற்படுத்தியுள்ளது. மொத்தம் நான்கு பேரைக் கொண்ட இந்தக் குழுவில், இருவர் வெளியிலேயே கண்காணிப்பில் ஈடுபட, மற்ற இருவர் சுற்றுச்சுவரின் கதவை உடைத்து உள்ளே செல்ல முயன்றுள்ளனர். இதற்கிடையே சத்தம் கேட்டு விழித்துக்கொண்ட அண்டை வீட்டுப் பெண் ஒருவர் ஜன்னல் வழியாகப் பார்த்து கூச்சலிட்டதால், அந்த மர்ம நபர்கள் தங்கள் கொள்ளை முயற்சியைக் கைவிட்டு அங்கிருந்து தப்பிச் சென்றனர். இந்த முழு நிகழ்வும் அப்பகுதியில் பொருத்தப்பட்டிருந்த சிசிடிவி கேமராக்களில் தெளிவாகப் பதிவாகி உள்ளன.
இந்த சம்பவம் தொடர்பாக ஜிகனி காவல் நிலைய அதிகாரிள் வழக்குப் பதிவு செய்து, கேமரா பதிவுகளை அடிப்படையாகக் கொண்டு குற்றவாளிகளைத் தீவிரமாகத் தேடி வருகின்றனர். தார்வாட், ஹுப்பள்ளி, ஹாசன் உள்ளிட்ட மாநிலத்தின் பிற இடங்களில் நடைபெற்ற பல தொடர் திருட்டுச் சம்பவங்களுக்கும் இந்தக் குறிப்பிட்ட குழுவிற்கும் நெருங்கிய தொடர்பு இருக்கலாம் என காவல்துறையினர் தீவிரமாகச் சந்தேகிக்கின்றனர். மேலும், இந்தக் கொள்ளையர்கள் தங்களைத் தடுக்க முற்படுவோரைக் கொடூரமாகத் தாக்கும் அபாயம் உள்ளதாகவும் காவல்துறை தரப்பில் எச்சரிக்கப்பட்டுள்ளது.
தொடர்ச்சியாக அறியப்படும் இதுபோன்ற குற்றச் சம்பவங்களால் ஆனேக்கல் மற்றும் ஜிகனி சுற்றுவட்டாரப் பகுதி மக்களிடையே கடும் பீதி நிலவுகிறது. இதனைத் தொடர்ந்து, அப்பகுதி மக்கள் அனைவரும் குறிப்பாக இரவு நேரங்களில் கூடுதல் எச்சரிக்கையுடனும் பாதுகாப்பவுடனும் இருக்க வேண்டும் என்று காவல்துறையினர் வேண்டுகோள் விடுத்துள்ளனர். மேலும், தங்கள் வசிப்பிடங்களுக்கு அருகே அறிமுகமில்லாத நபர்களின் நடமாட்டமோ அல்லது சந்தேகத்திற்குரிய வகையிலான செயல்களோ தென்பட்டால், எவ்வித தாமதமுமின்றி உடனடியாக அருகில் உள்ள காவல் நிலையத்திற்குத் தகவல் அளிக்குமாறும் பொதுமக்களுக்கு அறிவுறுத்தப்பட்டுள்ளனர்.