வாடிக்கையாளர் சேவையில் சிறப்பாகச் செயல்படாத மற்றும் விதிமுறைகளை மீறும் வங்கிகள் மற்றும் நிதி நிறுவனங்கள் மீது ரிசர்வ் வங்கி தொடர்ந்து நடவடிக்கைகளை எடுத்து வருகிறது. அதன் ஒரு பகுதியாக, தற்போது மேற்கு வங்கம் மற்றும் சண்டிகரைச் சேர்ந்த நான்கு வங்கி அல்லாத நிதி நிறுவனங்களின் (NBFC) பதிவுச் சான்றிதழ்களை ரிசர்வ் வங்கி ரத்து செய்துள்ளது. இதன் விளைவாக, இந்த நிறுவனங்கள் இனி யாருக்கும் கடன் கொடுக்க முடியாது.
மேலும், நான்கு நிதி நிறுவனங்கள் தங்கள் சான்றிதழ்களைத் தாமாக முன்வந்து ரிசர்வ் வங்கியிடம் ஒப்படைத்துள்ளன. செயல்பாட்டை நிறுத்தியது, இணைப்பு, ஒருங்கிணைப்பு, அல்லது பதிவு செய்யப்படாத முக்கிய முதலீட்டு நிறுவனத்திற்கான தகுதிகளைப் பூர்த்தி செய்யாதது போன்ற காரணங்களால் இந்த நிறுவனங்கள் சான்றிதழ்களை ஒப்படைத்துள்ளன.
இதற்கிடையில், ஒடிசாவில் உள்ள பரலகேமுண்டி கூட்டுறவு நகர்ப்புற வங்கிக்கு ரிசர்வ் வங்கியின் உத்தரவுகளை மீறியதற்காக ரூ. 13,000 அபராதம் விதிக்கப்பட்டுள்ளது. முன் அனுமதி இல்லாமல் மூலதனச் செலவினங்களை மேற்கொண்டது மற்றும் கடன் தகவல்களைச் சமர்ப்பிக்கத் தவறியது போன்ற விதிமீறல்களுக்காக இந்த அபராதம் விதிக்கப்பட்டது.
மறுபுறம், ரிசர்வ் வங்கி நேற்று திறந்த சந்தை செயல்பாடுகள் (OMO) மூலம் அரசுப் பத்திரங்களை வாங்கி வங்கி அமைப்புக்குள் ரூ. 50,000 கோடி புதிய பணப்புழக்கத்தைச் செலுத்தியுள்ளது. இந்தத் தொகைக்கு எதிராக ரூ. 1,11,615 கோடிக்கு ஏலம் பெறப்பட்டது.