“தெய்வங்கள் எல்லாம் தோற்றே போகும் தந்தை அன்பின் முன்னே”…. உலக தந்தையர் தினம் ஏன் கொண்டாடப்படுகிறது தெரியுமா?…. பலரும் அறியாத ஆச்சரிய தகவல்…!

ஒவ்வொரு மனிதனின் வாழ்விலும் அடித்தளமாக விளங்குபவர் தந்தை. குடும்பத்தின் சுமையைத் தன் தோள்களில் தாங்கி, பிள்ளைகளின் எதிர்காலத்திற்காகத் தன் சுகங்களை தியாகம் செய்யும் தந்தையர்களைக் கௌரவிப்பதற்காகவே ஆண்டுதோறும் ஜூன் மாதத்தின் மூன்றாவது ஞாயிற்றுக்கிழமை உலக தந்தையர் தினம் கொண்டாடப்படுகிறது. குழந்தைகள் தங்கள் வாழ்க்கையில் முக்கிய பங்கு வகிக்கும் தந்தையை உணர்ச்சி ரீதியாகவும் மன ரீதியாகவும் புரிந்து கொள்ளவும், குடும்ப அமைப்பில் அவர்களின் அசைக்க முடியாத முக்கியத்துவத்தை உணர்ந்து கொள்ளவும் இந்தத் திருநாள் ஒரு நல்வாய்ப்பாக அமைகிறது.

இந்தத் தினத்தின் பின்னணியில் ஒரு நெகிழ்ச்சியான வரலாறு ஒளிந்துள்ளது. அமெரிக்காவைச் சேர்ந்த சொனாரா லூயிஸ் ஸ்மார்ட் டோட் என்ற பெண்மணிதான் முதன்முதலில் இதற்கான விதையை விதைத்தார். தாய் இல்லாத சூழ்நிலையில், தன்னையும் தன் உடன்பிறப்புகளையும் அன்போடு வளர்த்தெடுத்த தன் தந்தையைப் பெருமைப்படுத்த அவர் விரும்பினார். 1909-ம் ஆண்டு தேவாலயத்தில் அன்னையர் தினப் போதனையைக் கேட்டுக்கொண்டிருந்தபோது, தந்தையர்களுக்கும் இதுபோன்று ஒரு தினம் இருக்க வேண்டும் என்ற எண்ணம் அவருக்குத் தோன்றியது. அவரது தொடர் முயற்சியால் 1910-ல் இதற்கான மசோதா அறிமுகப்படுத்தப்பட்டு, முதன்முதலாக வாஷிங்டனில் உள்ள ஸ்போகேனில் தந்தையர் தினம் கொண்டாடப்பட்டது.

இதன் தொடர்ச்சியாக, 1966-ஆம் ஆண்டு அமெரிக்க ஜனாதிபதி லிண்டன் பி. ஜான்சன், ஜூன் மாதத்தின் மூன்றாவது ஞாயிற்றுக்கிழமையை அதிகாரப்பூர்வமாகத் தந்தையர் தினமாக அறிவித்தார். பின்னர் 1972-ல் அப்போதைய ஜனாதிபதி ரிச்சர்ட் நிக்சன் இதனை ஒரு தேசிய விடுமுறை நாளாக மாற்றி சட்டப்பூர்வமாக்கினார். அமெரிக்காவில் தொடங்கிய இந்த உன்னதமான முயற்சி, இன்று உலக நாடுகள் முழுவதிலும் பரவி, தற்போது இந்தியாவிலும் மிகத் தீவிரமாகவும் உணர்வுப்பூர்வமாகவும் கொண்டாடப்பட்டு வருகிறது.

தந்தையர் தினம் என்பது வெறும் ஒருநாள் கொண்டாட்டத்துடன் கடந்து போக வேண்டிய ஒன்று அல்ல. நம்மை நல்வழியில் நடத்தும் தந்தை ஸ்தானத்தில் இருப்பவர்களை வாழ்நாளின் எல்லா நாட்களிலும் மதித்து நடப்பது நம் கடமையாகும். குறிப்பாக இந்த நன்னாளில், நம் தந்தையிடமும், நமக்கு வழிகாட்டியாகத் திகழும் தந்தை போன்றோரிடமும் மனதார வாழ்த்துக்களைப் பெற்று, நம் நன்றியுணர்வை வெளிப்படுத்த வேண்டும். வார்த்தைகளாலோ அல்லது சிறிய பரிசுகளாலோ அவர்களை மகிழ்வித்து, “நாங்கள் உங்கள் பின்னே இருக்கிறோம்” என்ற நம்பிக்கையை அவர்களுக்கு அளிப்பதே இந்தத் தினத்தின் உண்மையான நோக்கமாகும்.