ஆக்ஸ்பாம் (Oxfam) நிறுவனம் வெளியிட்டுள்ள சமீபத்திய அறிக்கையின்படி, உலகின் முன்னணி எண்ணெய் நிறுவனங்கள் ஒரு நொடிக்கு சுமார் 3,000 டாலர் (இந்திய மதிப்பில் சுமார் 2.5 லட்சம் ரூபாய்) லாபம் ஈட்டுவதாகத் திடுக்கிடும் தகவல் வெளியாகியுள்ளது. அமெரிக்கா உள்ளிட்ட பல நாடுகளில் உள்ள நடுத்தரக் குடும்பங்கள் தங்கள் அன்றாட மின்சாரம் மற்றும் எரிபொருள் கட்டணங்களைச் செலுத்த முடியாமல் திணறி வரும் வேளையில், இந்த எண்ணெய் ஜாம்பவான்களின் அசுரத்தனமான லாபம் சமூக சமநிலையின்மையைக் காட்டுவதாக அந்த அறிக்கை சுட்டிக்காட்டுகிறது.
ஈரான் மற்றும் மத்திய கிழக்கு நாடுகளில் நிலவும் போர் பதற்றம் மற்றும் விநியோகத் தடைகள் காரணமாக உலகளவில் கச்சா எண்ணெய் விலை கணிசமாக உயர்ந்துள்ளது. இந்தச் சூழலைத் தங்களுக்குச் சாதகமாகப் பயன்படுத்திக் கொள்ளும் எண்ணெய் நிறுவனங்கள், சாமானிய மக்களின் பாக்கெட்டுகளைக் காலி செய்து தங்கள் கஜானாவை நிரப்பி வருகின்றன. எரிபொருள் விலை உயர்வால் அத்தியாவசியப் பொருட்களின் விலையும் உயர்ந்து, உலகெங்கிலும் உள்ள ஏழை மற்றும் நடுத்தர மக்களின் வாழ்வாதாரம் பெரும் கேள்விக்குறியாகியுள்ளது.
இந்த இக்கட்டான நிலையைக் கையாள, அதிக லாபம் ஈட்டும் நிறுவனங்கள் மீது கூடுதல் வரி (Windfall Tax) விதிக்கப்பட வேண்டும் என்று ஆக்ஸ்பாம் பரிந்துரைத்துள்ளது. அவ்வாறு வசூலிக்கப்படும் தொகையைப் பாதிக்கப்பட்ட குடும்பங்களுக்குத் துணையாகவும், புதுப்பிக்கத்தக்க எரிசக்தி திட்டங்களுக்கும் பயன்படுத்த வேண்டும் என்று வலியுறுத்தப்பட்டுள்ளது. கார்ப்பரேட் நிறுவனங்களின் பேராசையாலும், போர்ச் சூழலாலும் சாமானிய மக்கள் படும் இன்னல்கள் சர்வதேச அளவில் ஒரு பெரிய விவாதத்தை ஏற்படுத்தியுள்ளது.