ஒடிசா மாநிலம் கியோஞ்சர் மாவட்டத்தில், வங்கி நடைமுறைகளால் மனமுடைந்த ஒரு நபர், உயிரிழந்த தனது சகோதரியின் எலும்புக்கூட்டை வங்கிக்குச் சுமந்து வந்த சம்பவம் நாடு முழுவதும் பெரும் அதிர்வலைகளை ஏற்படுத்தியுள்ளது. தியனாலி கிராமத்தைச் சேர்ந்த ஜீத்து முண்டா (50) என்பவரின் சகோதரி கர்லா முண்டா கடந்த ஜனவரி மாதம் உயிரிழந்தார். அவர் தனது கால்நடைகளை விற்றுச் சேர்த்த சுமார் 19,300 ரூபாய் பணத்தை மாலிபோசி கிளையில் உள்ள ஒடிசா கிராமிய வங்கியில் சேமித்து வைத்திருந்தார். வாரிசுதாரர் இல்லாத நிலையில், அந்தப் பணத்தைப் பெற ஜீத்து முண்டா அணுகியபோது வங்கி ஊழியர்களின் அணுகுமுறை மனிதாபிமானமற்ற நிலைக்கு அவரைத் தள்ளியுள்ளது.
படிப்பறிவில்லாத பழங்குடியினத்தைச் சேர்ந்த ஜீத்து முண்டா, தனது சகோதரியின் இறப்பை வங்கி அதிகாரிகளிடம் பலமுறை எடுத்துக்கூறியும் அவர்கள் அதனை ஏற்கவில்லை எனக் கூறப்படுகிறது. “பணத்தை எடுக்க வேண்டுமென்றால் கணக்கு வைத்திருப்பவரை நேரில் அழைத்து வாருங்கள்” என்று ஊழியர்கள் பிடிவாதமாகக் கூறியதால், வேறு வழியின்றி விரக்தியடைந்த ஜீத்து, புதைக்கப்பட்ட தனது சகோதரியின் உடலைத் தோண்டி எடுத்து, எலும்புக்கூட்டை ஒரு சாக்கு மூட்டையில் கட்டி 3 கிலோமீட்டர் தூரம் சுமந்து வங்கிக்கு வந்துள்ளார். இந்தச் செயல் வங்கி ஊழியர்களையும் பொதுமக்களையும் உறைய வைத்தது.
இச்சம்பவம் குறித்துத் தகவலறிந்த காவல்துறை மற்றும் வருவாய்த்துறை அதிகாரிகள் விரைந்து செயல்பட்டு ஜீத்துவைச் சமாதானப்படுத்தினர். வங்கி ஆவணங்களில் உரிய வாரிசுதாரர் விவரம் இல்லாததால் ஏற்பட்ட குழப்பத்தை ஊழியர்கள் முறையாகக் கையாண்டிருக்க வேண்டும் என்று அதிகாரிகள் சுட்டிக்காட்டினர். ஒடிசா மாநில அமைச்சர் சுரேஷ் பூஜாரி இச்சம்பவத்திற்குக் கடும் கண்டனம் தெரிவித்ததோடு, சம்பந்தப்பட்ட வங்கி ஊழியர்கள் மீது ஒழுங்கு நடவடிக்கை எடுக்கப்படும் என்றும், ஏழை எளிய மக்களிடம் வங்கி ஊழியர்கள் கனிவுடன் நடக்க வேண்டும் என்றும் அறிவுறுத்தியுள்ளார்.
பாதிக்கப்பட்ட ஜீத்து முண்டாவிற்கு உடனடியாக ரெட் கிராஸ் நிதியிலிருந்து 20,000 ரூபாய் வழங்க மாவட்ட நிர்வாகம் உத்தரவிட்டுள்ளது. மேலும், அவருக்குத் தேவையான வாரிசுச் சான்றிதழ் மற்றும் இறப்புச் சான்றிதழ்களை வருவாய்த் துறை மூலமாக விரைவாகப் பெற்றுத் தந்து, வங்கியில் உள்ள சேமிப்புப் பணத்தை அவரிடம் ஒப்படைக்கத் தேவையான நடவடிக்கைகள் போர்க்கால அடிப்படையில் எடுக்கப்பட்டு வருகின்றன. மனிதாபிமானத்தை விடவும் விதிமுறைகளே பெரிது என நினைக்கும் அதிகார வர்க்கத்தின் போக்கிற்கு இச்சம்பவம் ஒரு கசப்பான உதாரணமாக மாறியுள்ளது.