நடந்து முடிந்த சட்டமன்றத் தேர்தலில் திமுக சந்தித்த எதிர்பாராத பின்னடைவு, அக்கட்சியில் பெரும் அரசியல் மாற்றங்களை ஏற்படுத்தத் தொடங்கியுள்ளது. தொடர்ந்து இரண்டாவது முறையாக ஆட்சியைப் பிடித்துவிடலாம் என்ற நம்பிக்கையில் இருந்த திமுகவிற்கு, இந்தத் தேர்தல் முடிவு ஒரு பெரிய சறுக்கலாக அமைந்தது. குறிப்பாக, தவெக தலைவர் விஜய்யின் அரசியல் வருகையைத் தொடக்கத்தில் பெரிதாகக் கண்டுகொள்ளாததே இந்தத் தோல்விக்கு முக்கியக் காரணம் என்ற விமர்சனங்கள் எழுந்துள்ளன. தோல்விக்கான காரணங்கள் குறித்து ஆய்வு செய்ய அமைக்கப்பட்ட குழுவினர் அளித்த விரிவான அறிக்கையின் அடிப்படையில், திமுக தலைவர் மு.க.ஸ்டாலின் கட்சியை மறுகட்டமைப்பு செய்யும் பணிகளை தீவிரப்படுத்தியுள்ளார்.
சமீபத்தில் நடைபெற்ற திமுக செயற்குழு கூட்டத்தில் மு.க.ஸ்டாலின் அறிவித்த சில முக்கிய முடிவுகள் கட்சியின் மூத்த நிர்வாகிகளிடையே பெரும் அதிர்ச்சியை ஏற்படுத்தியுள்ளன. குறிப்பாக, 70 வயதைக் கடந்தவர்களுக்கு இனி மாவட்டச் செயலாளர் பதவி கிடையாது என்ற அறிவிப்பு, கட்சியின் முக்கியத் தூண்களாக விளங்கிய மூத்த தலைவர்களைக் கலங்கடித்துள்ளது. இதன் காரணமாக ஏ.வ.வேலு, முத்துசாமி, அனிதா ராதாகிருஷ்ணன், கே.கே.எஸ்.எஸ்.ஆர். ராமச்சந்திரன் உள்ளிட்ட 13 மூத்த நிர்வாகிகளின் மாவட்டச் செயலாளர் பதவிகள் பறிபோகும் சூழல் உருவாகியுள்ளது. இதுமட்டுமன்றி, கிளை, பேரூர் மற்றும் நகரச் செயலாளர் பதவிகளுக்கும் 2 ஆண்டுகள் மட்டுமே காலம் என்றும், அதற்கும் வயது வரம்பு நிர்ணயிக்கப்பட்டுள்ளதாகவும் வெளியாகியுள்ள தகவல்கள் நிர்வாகிகளிடையே பெரும் கொந்தளிப்பை ஏற்படுத்தியுள்ளன.
கட்சியின் தலைமைக் கழகத்திலும், உயர்மட்டப் பொறுப்புகளிலும் அதிரடி மாற்றங்களை மேற்கொள்ள திட்டமிடப்பட்டுள்ளது. தேர்தல் தோல்விக்குப் பிறகு கனிமொழியும், உதயநிதி ஸ்டாலினும் இணைந்து கட்சியின் எதிர்காலத்திற்காகச் செயல்படத் தொடங்கியுள்ளனர். மூத்த நிர்வாகிகளின் ஆதிக்கத்தைக் குறைத்து, இளைஞர்களுக்கு வாய்ப்பளிக்கும் வகையில் இவர்கள் இருவரும் இணைந்து புதிய வியூகங்களை வகுத்து வருகின்றனர். இதன் ஒரு பகுதியாக, பொதுச்செயலாளர், பொருளாளர், முதன்மைச் செயலாளர் மற்றும் துணைப் பொதுச்செயலாளர் ஆகிய முக்கியப் பதவிகளுக்கு புதிய முகங்களை நியமிக்க தீவிர ஆலோசனைகள் நடைபெற்று வருகின்றன.
இந்த மறுகட்டமைப்பில் கனிமொழிக்கு மிக முக்கியப் பொறுப்பு வழங்கப்படும் எனத் தெரிகிறது. தற்போதைய பொதுச்செயலாளர் துரைமுருகனுக்கு வயது மூப்பு காரணமாக தீவிரமாகச் செயல்பட முடியாத சூழல் நிலவுவதால், அந்தப் பொறுப்பை கனிமொழிக்கு வழங்குவது குறித்து ஆலோசிக்கப்பட்டு வருகிறது. அதேநேரத்தில், உதயநிதி ஸ்டாலின் எதிர்க்கட்சித் தலைவராகப் பொறுப்பேற்றுள்ள நிலையில், மீண்டும் ‘செயல் தலைவர்’ என்ற பதவியை உருவாக்கி அதைத் தனக்கு வழங்க வேண்டும் என கனிமொழி வலியுறுத்தி வருவதாகவும் கூறப்படுகிறது. மேலும், உதயநிதி ஸ்டாலினை துணைப் பொதுச்செயலாளராக நியமிக்கவும், பொருளாளர் டி.ஆர்.பாலுவிற்குப் பதிலாக ஏ.வ.வேலுவைக் கொண்டுவரவும் திட்டமிடப்பட்டு வருகிறது. சீனியர்களின் எதிர்ப்புகளுக்கு மத்தியில் இந்த மாற்றங்கள் அறிவாலய வட்டாரத்தில் பெரும் பரபரப்பை ஏற்படுத்தியுள்ளன.