ஜிமெயில் யூசர்நேம் மாற்ற ஆசையா…? கூகுள் கொடுத்த வேற லெவல் அப்டேட்…. இதோ முழு விவரம்…!

ஜிமெயில் பயனர்கள் தங்களது பழைய மின்னஞ்சல் முகவரியை மாற்றி கொள்ளும் வசதியை கூகுள் நிறுவனம் தற்போது அறிமுகப்படுத்தியுள்ளது. இதன் மூலம், உங்களது பழைய கணக்கில் உள்ள புகைப்படங்கள், கோப்புகள் மற்றும் சப்ஸ்கிரிப்ஷன்கள் என எவ்விதத் தரவுகளும் அழியாமல் அப்படியே புதிய முகவரிக்கு மாற்றப்படும். பழைய முகவரிக்கு வரும் மின்னஞ்சல்களும் தானாகவே புதிய முகவரிக்கு வந்து சேரும் என்பதால் பயனர்களுக்குப் பெரிய சிரமம் இருக்காது. சிறு வயதில் விசித்திரமான பெயர்களில் மின்னஞ்சல் கணக்கு வைத்திருப்பவர்கள், இப்போது தொழில்முறை தேவைக்காகப் பெயரை மாற்ற இது ஒரு நல்ல வாய்ப்பாகும்.

இந்த புதிய வசதியைப் பயன்படுத்துவதில் சில கட்டுப்பாடுகளையும் கூகுள் விதித்துள்ளது. ஒரு பயனர் தனது ஜிமெயில் ஐடியை வாழ்நாளில் அதிகபட்சமாக மூன்று முறை மட்டுமே மாற்ற முடியும்; மேலும் ஒருமுறை மாற்றினால் அடுத்த மாற்றத்திற்கு ஓராண்டு காலம் காத்திருக்க வேண்டும். தற்போதைக்கு @gmail.com என்று முடியும் கணக்குகளுக்கு மட்டுமே இந்தச் சேவை வழங்கப்படுகிறது. கூகுள் கணக்கின் ‘தனிப்பட்ட தகவல்’ பகுதிக்குச் சென்று இந்த மாற்றத்தைச் செய்துகொள்ளலாம். இந்த வசதி தற்போது படிப்படியாக அனைத்துப் பயனர்களுக்கும் வழங்கப்பட்டு வருகிறது.