“கண்ணா 2 லட்டு தின்ன ஆசையா..?”அண்ணாமலை கொடுத்த அதிர்ச்சி.. அலறியடித்த டெல்லி.. அமித் ஷா தூக்கி வீசிய ‘பவர்ஃபுல்’ 2 ஆஃபர்கள்.. மல்லுக்கட்டும் பாஜக..!!

தமிழக பாஜக முன்னாள் தலைவர் அண்ணாமலை, கட்சியில் இருந்து விலக விரும்புவதாகக் கூறி தனது ராஜினாமா கடிதத்தை தேசிய தலைமைடம் வழங்கியுள்ளார் என்ற தகவல் அரசியல் வட்டாரத்தில் பெரும் பரபரப்பை ஏற்படுத்தியுள்ளது. அண்மையில் நடைபெற்ற தமிழக சட்டப்பேரவைத் தேர்தல் முடிவுகள் மற்றும் உட்கட்சி விவகாரங்களால் அதிருப்தியில் இருந்த அவர், நேற்று அவசரமாக டெல்லி சென்றார். அங்கு பாஜக தேசிய தலைவர் நிதின் நபின், மத்திய உள்துறை அமைச்சர் அமித் ஷா மற்றும் அமைப்பு பொதுச்செயலாளர் பி.எல். சந்தோஷ் ஆகியோரைத் தனித்தனியாகச் சந்தித்துத் தனது நிலைப்பாடு மற்றும் தமிழக அரசியல் சூழல் குறித்து விரிவாக விளக்கினார்.

அண்ணாமலைக்கு இளைஞர்கள் மத்தியிலும், தமிழகத்திலும் இருக்கும் தனித்துவமான செல்வாக்கைக் கருத்தில் கொண்டு, அவரது ராஜினாமாவை ஏற்க பாஜக தேசிய தலைமை மறுத்துள்ளதாகக் கூறப்படுகிறது. அவர் முழுமையாக வெளியேறினால் தமிழகத்தில் கட்சியின் வளர்ச்சிக்கு அது பெரும் பின்னடைவாக அமையும் என்பதால், அவரைத் தக்கவைக்க அமித் ஷா பல்வேறு முக்கிய ஆஃபர்களை வழங்கியுள்ளார். தேசிய அளவிலான முக்கியப் பொறுப்பு, மாநிலங்களவை (Rajya Sabha) உறுப்பினர் பதவி அல்லது மத்திய அமைச்சரவையில் இடம் போன்ற வாக்குறுதிகள் இதில் அடங்கும் எனக் கூறப்படுகிறது.

2024 மக்களவைத் தேர்தலில் அண்ணாமலை தலைமையில் தனித்துப் போட்டியிட்டுப் பெற்ற வாக்கு வங்கி, அதன் பிறகு அதிமுகவுடன் கூட்டணி அமைத்துப் போட்டியிட்ட சட்டப்பேரவைத் தேர்தலில் கட்சிக்கு எதிர்பார்த்த வெற்றியைத் தரவில்லை. இதனால் எழுந்த விமர்சனங்களும், தற்போதைய மாநிலத் தலைவர் நயினார் நாகேந்திரனுடனான கருத்து வேறுபாடுகளும் இந்த சூழலுக்கு முக்கியக் காரணமாகப் பார்க்கப்படுகிறது. இதனிடையே, இருவருக்கும் இடையிலான சமரசத்தை ஏற்படுத்த நயினார் நாகேந்திரனும் டெல்லிக்கு அவசரமாக அழைக்கப்பட்டு, அமித் ஷா முன்னிலையில் தனித்தனியாகவும் கூட்டாகவும் ஆலோசனைகள் நடத்தப்பட்டு வருகின்றன.

தனது பிறந்தநாளான ஜூன் 4-ஆம் தேதி புதிய அரசியல் கட்சி அல்லது இயக்கம் குறித்த முக்கிய அறிவிப்பை அண்ணாமலை வெளியிடலாம் என்று அவரது ஆதரவாளர்கள் தமிழகத்தின் பல்வேறு இடங்களில் போஸ்டர்களை ஒட்டி எதிர்பார்ப்பைக் கூட்டியுள்ளனர். டெல்லி விமான நிலையத்தில் செய்தியாளர்களிடம் பேசிய அண்ணாமலை, “இரண்டு நாட்கள் பொறுத்திருங்கள், அனைத்துக் கேள்விகளுக்கும் விரிவாகப் பதில் சொல்கிறேன்” எனக் கூறியுள்ளார். இதனால், அவர் பாஜகவின் சமரச திட்டங்களை ஏற்றுத் தொடர்வாரா, தேசிய அரசியலுக்கு மாறுவாரா அல்லது தனிக்கட்சி தொடங்கி தமிழக அரசியலில் புதிய திருப்பத்தை ஏற்படுத்துவாரா என்பது நாளைக்குள் தெளிவாகத் தெரியவரும்.