கார் ஏற்றி இளம்பெண் கொல்லப்பட்ட சம்பவத்தில்… சிகிச்சை பெற்று வந்த மற்றொரு சிறுமியும் பலி… சோகம்..!!

விழுப்புரம் மாவட்டத்தைச் சேர்ந்த 18 வயது இளம் பெண் யான்சி மற்றும் சென்னை ராமாபுரத்தைச் சேர்ந்த அவரது 17 வயது சிறுமி ஆகியோர் கோயம்பேட்டில் உள்ள ஒரு தனியார் மதுபான விடுதிக்குச் சென்றுள்ளனர். அங்கு நடனமாடிக் கொண்டிருந்தபோது, ஒரு கும்பல் அந்தப் பெண்களிடம் தவறாக நடந்து கொண்டு தகராறில் ஈடுபட்டுள்ளது. விடுதி பாதுகாவலர்கள் இரு தரப்பையும் சமாதானப்படுத்தி வெளியே அனுப்பிய பிறகும், வெளியேயும் அவர்களுக்குள் வாக்குவாதம் நீடித்துள்ளது.

இதையடுத்து, அந்தப் பெண்கள் தங்களது நண்பர்களுடன் இருசக்கர வாகனத்தில் வீடு திரும்பிக் கொண்டிருந்தனர். அப்போது, ஆத்திரமடைந்த அந்த கும்பல் தங்களது காரில் பெண்களின் இருசக்கர வாகனத்தைப் பின்தொடர்ந்து துரத்தியுள்ளது. கோயம்பேடு மேம்பாலம் அருகே வந்தபோது, கார் வேண்டுமென்றே இருசக்கர வாகனத்தின் மீது மிக வேகமாக மோதியது. இதில் சம்பவ இடத்திலேயே யான்சி (18) தலைக்காயத்துடன் பரிதாபமாக உயிரிழந்தார்.

இந்த கொடூர விபத்தில் இருசக்கர வாகனத்தின் பின்னால் அமர்ந்திருந்த 17 வயது சிறுமி பலத்த காயமடைந்தார். அவர் உடனடியாக கீழ்ப்பாக்கம் அரசு மருத்துவமனையில் தீவிர சிகிச்சைப் பிரிவில் அனுமதிக்கப்பட்டார். ஆனால், அங்கு சிகிச்சை பலனின்றி ஜூன் 3-ஆம் தேதி அதிகாலை அந்தச் சிறுமியும் உயிரிழந்தார். இதனால் இந்த வழக்கில் பலி எண்ணிக்கை இரண்டாக உயர்ந்துள்ளது. இந்த விவகாரத்தில் சிசிடிவி காட்சிகளின் அடிப்படையில் போலீசார் விபத்து வழக்கை கொலை வழக்காக மாற்றி, சுமன் சக்திவேல் உள்ளிட்ட 7 பேரை இதுவரை கைது செய்துள்ளனர். மேலும், அந்த மதுபான விடுதிக்கும் சீல் வைக்கப்பட்டுள்ளது.