வாசலில் குரைத்தது குற்றமா? அடுத்த நிமிடமே துடிதுடித்த பிஞ்சு நாய்க்குட்டிகள்…. திருச்சியில் பெண்ணின் கொடூர செயல்…!

திருச்சி மாவட்டம் அந்தநல்லூர் அடுத்த கம்பரசம் பேட்டை பகுதியில், பிறந்து சில நாட்களே ஆன நாய்க்குட்டிகளைப் பெண் ஒருவர் கொடூரமான முறையில் சுவற்றில் வீசி சித்திரவதை செய்யும் வீடியோ சமூக வலைதளங்களில் வெளியாகி பெரும் அதிர்ச்சியை ஏற்படுத்தியுள்ளது. வாய் பேச முடியாத ஜீவன்கள் மீது நிகழ்த்தப்பட்ட இந்த மனிதாபிமானமற்ற செயல் காண்போரை நிலைகுலையச் செய்துள்ளது.

அந்தப் பகுதியைச் சேர்ந்த புவனேஸ்வரி என்பவர் தெரு நாய்களுக்குத் தொடர்ந்து உணவளித்து வந்துள்ளார். இதனை அவரது வீட்டின் எதிரே வசிக்கும் மீனாட்சி என்பவர் ஆரம்பம் முதலே எதிர்த்து வந்துள்ளார். நாய்களுக்கு உணவளிப்பது தொடர்பாக இருவருக்கும் இடையே அடிக்கடி தகராறு ஏற்பட்டு வந்த நிலையில், நாய்களை மீனாட்சி அடித்து விரட்டுவதை வழக்கமாகக் கொண்டிருந்ததாகக் கூறப்படுகிறது.

இந்நிலையில், சமீபத்தில் பிறந்த சில நாய்க்குட்டிகள் மீனாட்சியின் வீட்டின் வாசலில் நின்று குறைத்துக் கொண்டிருந்தன. இதனால் ஆத்திரமடைந்த மீனாட்சி, அந்தச் சிறிய நாய்க்குட்டிகளை ஒவ்வொன்றாகத் தூக்கிச் சுவற்றில் ஓங்கி வீசியுள்ளார். அந்த நாய்க்குட்டிகள் வலியால் துடிதுடிக்கக் கத்துவதையும் பொருட்படுத்தாமல், அவர் மீண்டும் மீண்டும் அத்தகைய செயலில் ஈடுபட்டது அங்கிருந்த சிசிடிவி கேமராவில் பதிவாகியுள்ளது.

இந்தக் கொடூரமான வீடியோ இணையத்தில் வைரலானதைத் தொடர்ந்து, அந்தப் பெண்ணிற்கு எதிராகப் பலரும் கண்டனக் குரல்களை எழுப்பி வருகின்றனர். விலங்கு நல ஆர்வலர்கள் மற்றும் பொதுமக்கள், வாய் பேசாத உயிரினங்களுக்கு இத்தகைய சித்திரவதையை அளித்த மீனாட்சி மீது கடும் நடவடிக்கை எடுக்க வேண்டும் என வலியுறுத்தி வருகின்றனர். நவீன காலத்தில் தொழில்நுட்ப வளர்ச்சியால் இத்தகைய அநீதிகள் வெளிச்சத்திற்கு வருவது ஆறுதலளித்தாலும், மனித நேயம் மறைந்து வருவதைச் சுட்டிக்காட்டுவதாக இந்தச் சம்பவம் அமைந்துள்ளது.