உத்தரப் பிரதேச மாநிலம் ராம்பூரில் நடைபெற்ற ஒரு திருமணத்திற்குப் பிறகு, மணமகள் தன் கணவர் வீட்டிற்கு வந்தடைந்தார். முதலிரவு அறையில் இருந்தபோது, திடீரென மணமகளுக்குக் தலைச்சுற்றல் ஏற்பட்டு மயங்கி விழுந்தார். இதனால் பதற்றமடைந்த மணமகன், உடனடியாகத் தன் நண்பர்களைத் தொடர்புகொண்டு விஷயத்தைக் கூறினார். அப்போது நண்பர்கள் அவரிடம் விளையாட்டாக, “இதுபோன்ற மயக்கம் கர்ப்பமாக இருக்கும்போதுதான் வரும்; ஒருவேளை அவள் ஏற்கனவே கர்ப்பமாக இருக்கிறாளோ?” என்று சந்தேகத்தைக் கிளப்பினர்.
நண்பர்களின் பேச்சைக் கேட்டு சந்தேகமடைந்த மணமகன், உடனே கடைக்கு ஓடிச் சென்று ஒரு கர்ப்பப் பரிசோதனை கருவியை (Pregnancy kit) வாங்கி வந்தார். அதைத் தன் மனைவியிடம் கொடுத்து பரிசோதனை செய்யுமாறு வற்புறுத்தினார். கணவனின் இந்தச் செயலால் கடும் கோபமும் அதிர்ச்சியும் அடைந்த மணமகள், அவரை கடுமையாகச் சாடினார். பின்னர், இந்த அவமானத்தைப் பற்றித் தன் அண்ணியிடம் போன் செய்து கூற, விஷயம் பெண்ணின் வீட்டாருக்குத் தெரிந்து, அவர்கள் ஒட்டுமொத்தக் குடும்பத்துடன் மாப்பிள்ளை வீட்டிற்கு விரைந்து வந்தனர்.
அதிகப்படியான வெயில் மற்றும் சோர்வு காரணமாகவே மணமகளுக்குத் தலைச்சுற்றல் ஏற்பட்டதே தவிர, வேறு எந்தக் காரணமும் இல்லை என்பதைப் பெண்ணின் குடும்பத்தினர் மணமகனுக்கு எடுத்துரைக்க முயன்றனர். ஆனால், அவர் எதையும் கேட்கத் தயாராக இல்லை. இறுதியாக, இந்த விவகாரம் கிராமப் பஞ்சாயத்திற்குச் சென்றது. இரு குடும்பத்தினருக்கும் இடையே நீண்ட பேச்சுவார்த்தை நடத்தப்பட்ட பிறகு, தன் சந்தேக புத்தியால் ஏற்பட்ட பெரிய தவறை உணர்ந்த மணமகன், பஞ்சாயத்தின் முன்னிலையில் தன் தவறை ஒப்புக்கொண்டார்.