உத்தரப் பிரதேசத் தலைநகர் லக்னோவில், கள்ளக்காதலுக்கு இடையூறாக இருந்த மாமியாரை, மருமகளே தனது காதலனுடன் சேர்ந்து கழுத்தை நெரித்துக் கொலை செய்த அதிர்ச்சிச் சம்பவம் வெளிச்சத்திற்கு வந்துள்ளது. நிஷாத்கஞ்ச் பகுதியில் வசித்து வந்த 69 வயதான நிர்மலா தேவி என்ற மூதாட்டி, கடந்த மார்ச் 21 அன்று அவரது வீட்டில் பிணமாகக் கண்டெடுக்கப்பட்டார். அவரது உடலில் இருந்த நகைகள் காணாமல் போயிருந்ததால், இது ஒரு கொள்ளைச் சம்பவம் என முதற்கட்டமாக கருதப்பட்டது. இருப்பினும், காவல்துறையின் தீவிர விசாரணையில், நிர்மலா தேவியின் மருமகள் ரஞ்சனா, தனது வீட்டில் வாடகைக்கு இருந்த காதலன் ராஜன் சர்மாவுடன் இணைந்து இந்தச் சதியைத் தீட்டியது அம்பலமானது.
இந்தக் கொடூரக் கொலை மிகவும் திட்டமிட்டு அரங்கேற்றப்பட்டுள்ளது. ரஞ்சனாவிற்கும் வாடகைதாரர் ராஜனுக்கும் இடையிலான முறையற்ற உறவை நிர்மலா தேவியும் அவரது மகனும் கண்டித்ததால், வீட்டில் அடிக்கடி தகராறு ஏற்பட்டுள்ளது. இதனால் ஆத்திரமடைந்த ரஞ்சனா, மாமியார் உயிரோடு இருக்கும் வரை தாங்கள் நிம்மதியாக வாழ முடியாது என முடிவெடுத்து, தனது கணவர் மற்றும் மகன் வேலைக்குச் சென்ற நேரத்தைப் பயன்படுத்திக் கொண்டுள்ளார். ராஜனை வீட்டிற்கு வரவழைத்து, இருவரும் சேர்ந்து நிர்மலா தேவியின் கை, கால்களைக் கட்டி, அவரது சேலையாலேயே கழுத்தை நெரித்துக் கொன்றுள்ளனர். பின்னர், இது கொள்ளைச் சம்பவம் என நம்பவைக்க சிசிடிவி கேமராக்களை அணைத்துவிட்டு நகைகளை மறைத்து வைத்துள்ளனர்.
இந்த மர்மமான கொலையை ஒரு மோப்ப நாய் துல்லியமாகக் கண்டுபிடித்துக் கொடுத்துள்ளது. சம்பவ இடத்திற்கு வந்த மோப்ப நாய், கூட்டத்தில் நின்று அழுதுகொண்டிருந்த காதலன் ராஜனை சரியாக அடையாளம் காட்டியது. இதனைத் தொடர்ந்து, மதியம் சிசிடிவி கேமராக்கள் அணைக்கப்பட்டிருந்தது மற்றும் மாலை நேரத்தில் ரஞ்சனாவும் ராஜனும் ஒன்றாக வீட்டை விட்டு வெளியேறிய காட்சிகளை வைத்து போலீஸார் இருவரையும் மடக்கிப் பிடித்தனர். விசாரணையில் இருவரும் தங்களது குற்றத்தை ஒப்புக்கொண்டனர். தற்போது ரஞ்சனா மற்றும் ராஜன் ஆகிய இருவரும் சிறையில் அடைக்கப்பட்டுள்ளனர். இந்தச் சம்பவம் அந்தப் பகுதியில் பெரும் பரபரப்பை ஏற்படுத்தியுள்ளது