“டேய் குடுத்துருடா” மரத்திலிருந்து கொட்டிய ரூ. 2 லட்சம் பண மழை.. வழக்கறிஞரின் பையைப் பறித்து குரங்கு செய்த லூட்டி… வைரலாகும் பரபரப்பு வீடியோ..!!

உத்தரப் பிரதேச மாநிலம் புலந்த்சாஹர் நீதிமன்ற வளாகத்தின் அருகே வழக்கறிஞர் ஒருவர் நிலப் பதிவு பணிகளுக்காகத் தன் சகாக்களுடன் சென்றுகொண்டிருந்தார். அப்போது முத்திரைத் தாள் வாங்குவதற்காகத் தனது பையில் 2 லட்சம் ரூபாய் ரொக்கப் பணத்தை வைத்திருந்தார். அந்தப் பையில் உணவுப் பொருட்கள் ஏதேனும் இருக்கும் என்று தவறாகப் புரிந்துகொண்ட ஒரு குரங்கு, திடீரென பாய்ந்து வந்து வழக்கறிஞரின் கையில் இருந்த பையைப் பறித்துக்கொண்டு அங்கிருந்த ஒரு வேப்ப மரத்தின் உச்சிக்கு ஓடியது.

மரத்தின் உச்சியில் அமர்ந்த குரங்கு பையைத் திறந்து பார்த்தபோது அதில் உணவு இல்லாததால், பையில் இருந்த 500 ரூபாய் நோட்டுக் கட்டுகளை ஒவ்வொன்றாக எடுத்து காற்றில் பறக்கவிட்டது. திடீரென மரத்திலிருந்து 500 ரூபாய் நோட்டுகள் மழைபோல கீழே கொட்டுவதைக் கண்டு அதிர்ச்சியடைந்த பொதுமக்களும் அங்கிருந்த வழக்கறிஞர்களும், காற்றில் பறந்த பணத்தைச் சேகரிக்க ஓடினர். இந்த விசித்திரமான காட்சி அங்கிருந்தவர்களின் மொபைல் போன்களிலும், சிசிடிவி கேமராக்களிலும் பதிவாகி இணையத்தில் வேகமாகப் பரவி வருகிறது.

பணத்தை மீட்டெடுக்க அங்கிருந்த நபர் ஒருவர் உடனடியாக அந்த மரத்தின் மீது ஏறி, பெரும் போராட்டத்திற்குப் பிறகு குரங்கை விரட்டி பணப் பையை பத்திரமாக மீட்டுக் கீழே கொண்டு வந்தார். அதிர்ஷ்டவசமாக வழக்கறிஞரின் பெரும்பாலான பணம் திரும்பக் கிடைத்துவிட்ட போதிலும், காற்றில் பறந்த சில நோட்டுகள் காணாமல் போயிருக்கலாம் என்று அஞ்சப்படுகிறது. இச்சம்பவம் நீதிமன்ற வளாகத்தில் சிறிது நேரம் பெரும் பரபரப்பையும், அதே சமயம் மக்களுக்கு வேடிக்கையையும் ஏற்படுத்தியது.