விதிமுறைகளை மீறி ‘ரீல்ஸ்’ போடும் தவெக MLA-க்கள்… அரசு அதிகாரிகளுடன் வெடித்த மோதல்… TVK அரசுக்கு புதிய சிக்கல்..!!

தமிழகத்தில் தமிழக வெற்றிக் கழக (தவெக) சட்டமன்ற உறுப்பினர்கள் தங்களது தொகுதிகளில் மேற்கொள்ளும் கள ஆய்வு நிகழ்வுகளை, சமூக ஊடகங்களில் நேரடியாக ‘ரீல்ஸ்’ மற்றும் வீடியோக்களாகப் பதிவிட்டு வருகின்றனர். இவ்வாறு அரசு அதிகாரிகளுடன் நடத்தும் ஆய்வுகளை உடனுக்குடன் சமூக வலைத்தளங்களில் பகிர்வதால், தவெக எம்.எல்.ஏ-க்களுடன் கள ஆய்வுக்குச் செல்ல அரசு அதிகாரிகள் கடும் தயக்கம் காட்டி வருவதாகக் கூறப்படுகிறது. பொதுவாக மக்கள் பிரதிநிதிகள் மேற்கொள்ளும் அதிகாரப்பூர்வ ஆய்வுகளை செய்தி மக்கள் தொடர்புத் துறை (DIPR) அதிகாரிகளின் ஒப்புதல் பெற்ற பிறகே சமூக ஊடகங்களில் பகிர வேண்டும் என்ற விதிமுறை உள்ளது. ஆனால், இந்த விதியை தவெக எம்.எல்.ஏ-க்கள் பொருட்படுத்துவதில்லை என்ற குற்றச்சாட்டு எழுந்துள்ளது.

இவ்வாறு எவ்விதத் தணிக்கையும் இன்றி, கள ஆய்வின்போது அதிகாரிகளிடம் கேட்கப்படும் கேள்விகளும், அங்குள்ள குறைபாடுகளும் நேரடியாகச் சமூக ஊடகங்களில் வெளியாவது அரசு நிர்வாகத்திற்குப் பின்னடைவை ஏற்படுத்துவதாக அரசுத் தரப்பில் கருதப்படுகிறது. இந்த நேரடிப் பதிவுகள் எதிர்க்கட்சிகளுக்குச் சாதகமான ஆதாரங்களாக மாறி, ஆளுங்கட்சிக்கும் அரசுக்கும் தேவையற்ற அரசியல் சிக்கல்களையும் விமர்சனங்களையும் உருவாக்கக்கூடும் என அரசியல் வட்டாரங்களில் பேசப்படுகிறது. இந்த விவகாரம் அரசு அதிகாரிகளுக்கும் தவெக சட்டமன்ற உறுப்பினர்களுக்கும் இடையே ஒருவித சுமுகமற்ற சூழலை ஏற்படுத்தியுள்ளதாகக் கூறப்படுகிறது.