அட கொடுமையே… பொண்ணு கிடைக்கலன்னு சாவு?… திருமணம் கைகூடாத ஏக்கம்… நெஞ்சை உலுக்கிய 29 இளைஞர்களின் கொடூர முடிவு…!!

மகாராஷ்டிராவின் ஜல்கான் மாவட்டத்தில், கடந்த ஆறு மாதங்களில் திருமணம் கைகூடவில்லை என்ற காரணத்திற்காக 29 இளைஞர்கள் தற்கொலை செய்து கொண்ட அதிர்ச்சித் தகவல் காவல்துறை புள்ளிவிவரங்கள் மூலம் வெளியாகியுள்ளது. இந்த காலகட்டத்தில் அங்கு பதிவான மொத்தம் 431-க்கும் மேற்பட்ட தற்கொலைகளில் பெரும் பகுதியினர் ஆண்கள் ஆவர். திருமணம் தள்ளிப்போவதும், பேசப்படும் வரன்கள் தொடர்ச்சியாக முறிந்துபோவதும் இளைஞர்களிடையே தீவிர மன அழுத்தத்தையும் தாழ்வு மனப்பான்மையையும் ஏற்படுத்தி, அவர்களை இத்தகைய கொடூர முடிவை நோக்கித் தள்ளியுள்ளது.

இந்த நிலைக்குப் பின்னால் பல ஆழமான சமூக மற்றும் பொருளாதாரக் காரணங்கள் உள்ளன. ஆண்-பெண் பாலின விகிதத்தில் நிலவும் சமநிலையற்ற தன்மை, கிராமப்புறங்களில் நிலவும் வேலைவாய்ப்பின்மை மற்றும் விவசாயத் துறையின் பொருளாதார ஸ்திரமின்மை ஆகியவை முக்கிய சவால்களாக உருவெடுத்துள்ளன. பெரும்பாலான பெண்களும் அவர்களின் குடும்பத்தினரும் நகர்ப்புறங்களில் நிலையான மாத வருமானம் ஈட்டும் நபர்களையே வரனாக விரும்புவதால், கிராமப்புற இளைஞர்களுக்கும் விவசாயம் செய்வோருக்கும் வரன் அமைவது கடினமாகியுள்ளது. இதன் விளைவாக, சமூகத்தின் பேச்சுகளுக்கும் கேலிகளுக்கும் பயந்து இளைஞர்கள் தீவிர மன உளைச்சலுக்கு ஆளாகின்றனர்.

திருமணம் என்பது வாழ்க்கையின் ஒரு பகுதி மட்டுமே தவிர, அதுவே ஒரு மனிதனின் சுயமரியாதையையோ அல்லது வாழ்க்கையின் வெற்றியையோ தீர்மானிக்கும் அளவுகோல் அல்ல என்பதைச் சமூகம் உணர வேண்டும். குறிப்பிட்ட வயதிற்குள் திருமணம் ஆகாத இளைஞர்கள் மீது குடும்பத்தினரும் சமூகமும் தேவையில்லாத அழுத்தத்தைச் சுமத்துவதைத் தவிர்க்க வேண்டும். அதேபோல, மன அழுத்தத்தால் தவிக்கும் இளைஞர்களுக்கு உரிய நேரத்தில் உளவியல் ஆலோசனைகளும், குடும்பத்தினரின் ஆதரவும் கிடைப்பதை உறுதி செய்வதன் மூலமே இதுபோன்ற தொடர் சோகங்களைத் தடுக்க முடியும்.