எடப்பாடி பழனிசாமியிடம் அமித்ஷா வைத்த முக்கிய டிமாண்ட்..? – தமிழக அரசியலில் திடீர் பரபரப்பு…!!

சமீபத்தில் டெல்லி சென்ற அதிமுக பொதுச்செயலாளர் எடப்பாடி பழனிசாமி (EPS), மத்திய உள்துறை அமைச்சர் அமித்ஷாவைச் சந்தித்தது தமிழக அரசியலில் பெரும் விவாதத்தை ஏற்படுத்தியுள்ளது. இந்தச் சந்திப்பின் போது, வரும் 2026 சட்டமன்றத் தேர்தலுக்கான கூட்டணி குறித்துப் பேசப்பட்ட நிலையில், பாஜக தரப்பிலிருந்து சில அதிரடி நிபந்தனைகள் விதிக்கப்பட்டதாகத் தகவல்கள் கசிந்துள்ளன. குறிப்பாக, வெற்றிபெற்றால் தமிழகத்தில் ‘கூட்டணி ஆட்சி’ அமைக்கப்பட வேண்டும் என்றும், தமிழக அமைச்சரவையில் பாஜகவிற்கு 3 முக்கிய அமைச்சர் பதவிகள் வழங்கப்பட வேண்டும் என்றும் அமித்ஷா கோரியதாகக் கூறப்படுகிறது.

பாஜக தரப்பு குறிப்பாக இந்து சமய அறநிலையத்துறை மற்றும் கல்வித்துறை உள்ளிட்ட முக்கியமான இலாகாக்களைத் தங்களுக்கு ஒதுக்க வேண்டும் என்று விருப்பப் பட்டியலில் வைத்திருப்பதாகத் தெரிகிறது. இருப்பினும், இந்த நிபந்தனைகளுக்கு எடப்பாடி பழனிசாமி அந்த இடத்திலேயே எந்தப் பதிலும் அளிக்காமல் மௌனம் காத்ததாக விவரமறிந்த வட்டாரங்கள் தெரிவிக்கின்றன. அதிமுக தனது ‘ஒற்றைத் தலைமை’ மற்றும் ‘தனிப் பெரும்பான்மை’ கொள்கையில் உறுதியாக உள்ள நிலையில், டெல்லியின் இந்த டிமாண்ட் கூட்டணிப் பேச்சுவார்த்தையில் புதிய திருப்பத்தை ஏற்படுத்தியுள்ளது.