மகாராஷ்டிராவின் சத்ரபதி சம்பாஜிநகரில், திருமணமான நான்கு மாதங்களிலேயே கணவர் மற்றும் அவரது குடும்பத்தினரின் ஏமாற்று வேலைகளால் இளம் பெண் ஒருவரின் வாழ்க்கை சீரழிந்த அதிர்ச்சி சம்பவம் வெளிச்சத்திற்கு வந்துள்ளது. கடந்த மே 20, 2025 அன்று திருமணமான நிலையில், அவரது கணவர் உடல் உறவு கொள்ள மறுத்து பொய்யான சத்தியங்களைக் கூறித் தட்டிக்கழித்து வந்துள்ளார். இதனைப் பற்றி மருத்துவர்களிடம் ஆலோசனை பெற வற்புறுத்தியபோது அந்தப் பெண் கடுமையாகத் தாக்கப்பட்டுள்ளார். விசாரணையில், தனது கணவர் ஆண்மைக்குறைவு உள்ளவர் என்பதும், அவர் தனது நண்பருடன் ஓரினச்சேர்க்கை உறவில் இருப்பதும் அந்தப் பெண்ணுக்குத் தெரியவந்தது. இந்த உண்மைகளைத் திருமணத்திற்கு முன்பே மறைத்து அவரது மாமியார் குடும்பத்தினர் திட்டமிட்டு ஏமாற்றியுள்ளனர்.
உடல் ரீதியான சித்திரவதைகள் மட்டுமின்றி, நாசிக்கில் சொத்து வாங்குவதற்காகப் பாதிக்கப்பட்ட பெண்ணிடம் 15 லட்சம் ரூபாய் வரதட்சணை கேட்டு அவரது மாமியார் உள்ளிட்டோர் தொடர்ந்து அழுத்தம் கொடுத்துள்ளனர். செப்டம்பர் 2025-ல் நடந்த ஒரு கடுமையான தாக்குதலுக்குப் பிறகு, மனரீதியாகவும் உடல் ரீதியாகவும் பாதிக்கப்பட்ட அந்தப் பெண் இறுதியாகக் காவல்துறையை நாடினார். கண்டோன்மென்ட் போலீசார் அளித்த புகாரின் அடிப்படையில், அவரது கணவர், மாமியார் மற்றும் உறவினர்கள் உட்பட மொத்தம் 10 பேர் மீது பல்வேறு சட்டப் பிரிவுகளின் கீழ் வழக்குப் பதிவு செய்து தீவிர விசாரணை மேற்கொண்டு வருகின்றனர்.