தமிழக சட்டப்பேரவைத் தேர்தல் முடிவுகளில், நடிகர் விஜய்யின் தமிழக வெற்றிக் கழகம் (த.வெ.க) 108 இடங்களைப் பிடித்து தனிப்பெரும் கட்சியாக உருவெடுத்துள்ளது. தமிழக வரலாற்றில் முதல்முறையாக ஒரு கூட்டணி ஆட்சி அமைவதற்கான சூழலை மக்கள் வழங்கியுள்ளனர். இருப்பினும், ஆட்சி அமைக்கத் தேவையான 118 இடங்கள் என்ற பெரும்பான்மை இலக்கை அடைய த.வெ.க-வுக்கு இன்னும் சில இடங்கள் குறைவாக இருப்பதால், ஆட்சி அமைப்பதில் தொடர்ந்து இழுபறி நீடிக்கிறது.
தற்போது காங்கிரஸின் 5 எம்.எல்.ஏ-க்கள் விஜய்க்கு ஆதரவு தெரிவித்துள்ள நிலையில், த.வெ.க கூட்டணியின் பலம் 113-ஆக உயர்ந்துள்ளது. ஆனாலும் ‘மேஜிக் நம்பர்’ எனப்படும் 118-ஐ தொட இன்னும் 5 எம்.எல்.ஏ-க்களின் ஆதரவு தேவைப்படுகிறது. தனிப்பெரும் கட்சி என்ற அடிப்படையில் தங்களை ஆட்சி அமைக்க அழைக்க வேண்டும் என்று விஜய் தரப்பு கோரிக்கை விடுத்திருந்தாலும், ஆளுநர் இதுவரை முறையான அழைப்பு விடுக்கவில்லை.
சட்டப்பேரவையில் நிலையான ஆட்சி அமைய வேண்டும் என்பதே ஆளுநரின் அடிப்படைக் கடமையாகும். அந்த வகையில், யார் பெரும்பான்மையை நிரூபிக்க முடியும் என்று ஆளுநர் கருதுகிறாரோ, அவரையே ஆட்சி அமைக்க அழைக்க அரசியலமைப்புச் சட்டம் வழிவகை செய்கிறது. குதிரை பேரத்தையோ அல்லது கட்சிப் பிளவுகளையோ தவிர்க்கும் நோக்கில், போதுமான பலத்தை உறுதிப்படுத்தும் கடிதங்களை ஆளுநர் எதிர்பார்ப்பதாகக் கூறப்படுகிறது.
இந்தச் சூழலில், அரசியலமைப்புச் சட்டப்பிரிவு 361-ன் படி ஆளுநரின் முடிவை நீதிமன்றத்தில் எளிதில் கேள்வி கேட்க முடியாது என்பது குறிப்பிடத்தக்கது. தற்போதைய நிலையில், த.வெ.க-வுக்கு மேலும் 5 எம்.எல்.ஏ-க்களின் ஆதரவு கிடைத்தால் மட்டுமே இந்த அரசியல் முட்டுக்கட்டை நீங்கி, விஜய் தலைமையிலான அரசு அமைவதற்கான வழி பிறக்கும் என அரசியல் ஆய்வாளர்கள் கருதுகின்றனர்.