ஈரான் போர்ச் சூழலால் சர்வதேச சந்தையில் கச்சா எண்ணெய் விலை கடுமையாக உயர்ந்து வருவது இந்தியப் பொருளாதாரத்திற்கு பெரும் சவாலாக மாறியுள்ளது. ஜனவரி மாதம் ஒரு பேரல் 63 டாலராக இருந்த இந்தியக் கச்சா எண்ணெய் கூடையின் (Indian Crude Oil Basket) சராசரி விலை, ஏப்ரல் மாதத்தில் 114 டாலராக உயர்ந்துள்ளது. வெறும் மூன்று மாதங்களில் ஏற்பட்டுள்ள இந்த 80 சதவீத விலை உயர்வு, இறக்குமதியை நம்பியிருக்கும் இந்தியாவிற்கு அந்நியச் செலாவணி இருப்பு மற்றும் நிதி மேலாண்மையில் பெரும் நெருக்கடியை உருவாக்கியுள்ளது.
கச்சா எண்ணெய் விலை ஒவ்வொரு 10 டாலர் உயரும் போதும் இந்தியப் பொருளாதாரத்தில் நான்கு முக்கிய பாதிப்புகள் ஏற்படுகின்றன. முதலாவதாக, போக்குவரத்து செலவு அதிகரிப்பால் அத்தியாவசியப் பொருட்களின் விலை உயர்ந்து பணவீக்கம் (CPI) அதிகரிக்கும். இரண்டாவதாக, எண்ணெய் இறக்குமதிக்கு அதிக டாலர்களைச் செலவிட வேண்டியிருப்பதால் நடப்புக் கணக்கு பற்றாக்குறை (CAD) மோசமடையும். மூன்றாவதாக, உற்பத்திச் செலவு உயர்வால் தொழில் வளர்ச்சி பாதிக்கப்பட்டு ஜிடிபி (GDP) குறையும். இறுதியாக, டாலருக்கான தேவை அதிகரிப்பால் இந்திய ரூபாயின் மதிப்பு மேலும் பலவீனமடையும் அபாயம் உள்ளது.
உலகின் முன்னணி நிதி நிறுவனமான கோல்ட்மேன் சாக்ஸ், இந்த ஆண்டின் இறுதியில் கச்சா எண்ணெய் விலை 90 டாலர் அளவில் நிலைபெறலாம் எனக் கணித்துள்ளது. ஈரான் போர் இப்போதே முடிவுக்கு வந்தாலும் கூட, 90 டாலர் என்ற விலை நிலையே இந்தியப் பொருளாதாரத்தில் 70 முதல் 80 அடிப்படை புள்ளிகள் வரை மோசமான தாக்கத்தை ஏற்படுத்தும் என எச்சரிக்கப்பட்டுள்ளது. தற்போதைய 114 டாலர் என்ற விலை உயர்வு சந்தையில் முழுமையாக எதிரொலிக்கும் பட்சத்தில், அதன் தாக்கம் இன்னும் வீரியமாக இருக்கும் என நிபுணர்கள் அஞ்சுகின்றனர்.
இந்த விலை உயர்வு சாதாரண பொதுமக்களின் அன்றாட வாழ்க்கையை நேரடியாகப் பாதிக்கும். கோடை வெயிலால் உணவுப் பொருட்கள் உற்பத்தி ஏற்கனவே சரிந்துள்ள நிலையில், பெட்ரோல், டீசல் விலை உயர்வு காய்கறி, பால் மற்றும் அரிசி போன்ற அத்தியாவசியப் பொருட்களின் விலையை மேலும் உயர்த்தும். பேருந்து, ஆட்டோ மற்றும் சரக்கு போக்குவரத்து கட்டணங்கள் உயருவது சாமானியர்களின் பட்ஜெட்டைச் சிதைக்கும். ஈரான்-அமெரிக்க பேச்சுவார்த்தையில் முன்னேற்றம் ஏற்படாத வரை, இந்தியப் பொருளாதாரம் இந்த இடியாப்பச் சிக்கலில் இருந்து மீள்வது கடினமாகவே தெரிகிறது.