திருப்பூர் மாவட்டம் முருங்கப்பாளையம் பகுதியில், இன்ஸ்டாகிராம் பழக்கத்தால் வீட்டை விட்டு வெளியேறிய மகள் சிம்யாவை (22), அவரது தந்தை ஆறுமுகம் கத்தியால் கழுத்தை அறுத்துக் கொலை செய்த சம்பவம் பெரும் அதிர்ச்சியை ஏற்படுத்தியுள்ளது. கடந்த ஜனவரி 2-ம் தேதி மாயமான சிம்யாவை, காவல்துறையினர் கன்னியாகுமரியில் மீட்டு பெற்றோரிடம் ஒப்படைத்தனர். திருமணமாகி ஒரு குழந்தை இருந்த நிலையில், மகளின் இத்தகைய செயலால் குடும்ப கௌரவம் பாதிக்கப்பட்டதாக தந்தை கடும் ஆத்திரத்தில் இருந்ததாகக் கூறப்படுகிறது.
மீட்டு வரப்பட்ட சிம்யாவிடம் நேற்று காலை தந்தை ஆறுமுகம் வாக்குவாதத்தில் ஈடுபட்டுள்ளார். அப்போது ஏற்பட்ட ஆத்திரத்தில், மறைத்து வைத்திருந்த கத்தியால் மகளின் கழுத்தை அறுத்துக் கொடூரமாகக் கொலை செய்தார். தகவலறிந்து வந்த வீரபாண்டி போலீசார், சிம்யாவின் உடலைக் கைப்பற்றி பிரேதப் பரிசோதனைக்கு அனுப்பி வைத்தனர். மகளைக் கொலை செய்த தந்தை ஆறுமுகத்தைக் கைது செய்த போலீசார், இச்சம்பவம் குறித்துத் தீவிர விசாரணை மேற்கொண்டு வருகின்றனர்.