மிரள வைக்கும் திருப்பம்..! இறந்தவரை அடக்கம் செய்த குடும்பத்தார்.. 7 நாட்களுக்குப் பின் கதவை தட்டிய நபர்… பார்த்ததும் அலறிய மகன்..!!

ஜார்கண்ட் மாநிலம் கூண்டி மாவட்டத்தைச் சேர்ந்த விஷ்ராம் முண்டா என்ற நபர், கடந்த மே 6 ஆம் தேதி உறவினர் வீட்டுத் திருமண விழாவிற்குச் சென்றபோது திடீரென காணாமல் போனார். குடும்பத்தினரும் கிராம மக்களும் அவரைப் பல இடங்களில் தேடியும் கண்டுபிடிக்க முடியவில்லை. இதற்கிடையில், மே 11 அன்று அப்பகுதி காவல்துறையினர் அடையாளம் தெரியாத ஒரு ஆணின் உடலை மீட்டனர். அந்த உடலின் தோற்றமும் உடல் அமைப்பும் காணாமல் போன விஷ்ராம் முண்டாவை ஒத்து இருந்ததால், அது அவர்தான் என்று தவறாக நினைத்த குடும்பத்தினர், உடலைப் பெற்றுக்கொண்டு தங்களது சமூக வழக்கப்படி அடக்கம் செய்து இறுதிச் சடங்குகளை முடித்தனர்.

விஷ்ராம் முண்டா இறந்துவிட்டார் என்று குடும்பத்தினரும் கிராமத்தினரும் சோகத்தில் மூழ்கியிருந்த நிலையில், அடக்கம் செய்யப்பட்ட 7 நாட்களுக்குப் பிறகு, அதாவது மே 17 அன்று, அவர் திடீரென கூண்டியில் உள்ள தனது மகளின் வீட்டிற்கு உயிருடன் திரும்பி வந்தார். இறந்ததாகக் கருதப்பட்ட தந்தை நேரில் நிற்பதைக் கண்டு அதிர்ச்சியடைந்த குடும்பத்தினர் அவரிடம் விசாரித்தபோது, தான் திருமண விழாவிலிருந்து நேரடியாக ராம்கர் பகுதிக்குச் சென்றுவிட்டதாகவும், தன்னிடம் மொபைல் போன் இல்லாததால் குடும்பத்தினரைத் தொடர்பு கொள்ள முடியவில்லை என்றும் அவர் தெரிவித்தார்.

இந்த விசித்திரமான சம்பவத்தால் அப்பகுதியில் பெரும் பரபரப்பு ஏற்பட்டுள்ளது. விஷ்ராம் முண்டா உயிருடன் திரும்பியதால் அவரது குடும்பத்தினர் மகிழ்ச்சியடைந்தாலும், காவல்துறையினருக்கு இது பெரிய சவாலாக மாறியுள்ளது. விஷ்ராம் முண்டா என நினைத்து அடக்கம் செய்யப்பட்ட அந்த அடையாளம் தெரியாத நபர் யார் என்ற குழப்பம் நீடிக்கிறது. தற்போது, காவல்துறையினர் அந்த உடலின் உண்மையான அடையாளத்தைக் கண்டறிய தீவிர விசாரணையைத் தொடங்கியுள்ளனர்.