விசுவாசம் முக்கியமா? வெற்றி முக்கியமா?… தவெக வில் திடீர் விரிசல்.. கட்சிக்குள் நடக்கும் பனிப்போர் அம்பலம்..!

2026 சட்டமன்றத் தேர்தலை முன்னிட்டு தமிழக வெற்றிக் கழகம் (தவெக) வேட்பாளர் தேர்வுப் பணிகளில் தீவிரமாக இறங்கியுள்ள நிலையில், கட்சியின் உயர்மட்ட நிர்வாகிகளிடையே வெடித்துள்ள கருத்து வேறுபாடு பரபரப்பை ஏற்படுத்தியுள்ளது. சென்னை பனையூர் அலுவலகத்தில் நடைபெற்ற ஆலோசனைக் கூட்டத்தில், கட்சியின் பொதுச்செயலாளர் புஸ்ஸி ஆனந்த் மற்றும் தேர்தல் வியூக வகுப்பாளர் ஜான் ஆரோக்கியசாமி ஆகியோருக்கு இடையே கடும் வாக்குவாதம் ஏற்பட்டதாகத் தகவல்கள் வெளியாகியுள்ளன. இது கட்சித் தொண்டர்களிடையே பெரும் குழப்பத்தை ஏற்படுத்தியுள்ளது.

இந்த மோதலுக்கு முக்கியக் காரணமாக அமைந்தது வேட்பாளர் தேர்வு முறைதான். விஜய் மக்கள் இயக்கக் காலத்திலிருந்தே கட்சிக்காக உண்மையாக உழைத்த நிர்வாகிகளுக்கே தேர்தலில் போட்டியிட முன்னுரிமை அளிக்க வேண்டும் என்று புஸ்ஸி ஆனந்த் வாதிட்டுள்ளார். ஆனால், ஜான் ஆரோக்கியசாமி இதற்கு நேர்மாறான கருத்தைக் கொண்டுள்ளார். வெறும் விசுவாசத்தை மட்டும் பார்க்காமல், தொகுதியில் செல்வாக்குள்ள மற்றும் வெற்றி பெறக்கூடிய தகுதியுள்ள நபர்களையே வேட்பாளர்களாக நிறுத்த வேண்டும் என்று அவர் வலியுறுத்தியுள்ளார்.

இருவருக்கும் இடையிலான இந்த காரசாரமான விவாதம் முற்றிய நிலையில், புஸ்ஸி ஆனந்த் அதிருப்தி அடைந்து கூட்டத்தை விட்டு வெளியேறியதாகவும், தனது அடுத்தகட்ட கட்சித் திட்டங்களை ரத்து செய்துள்ளதாகவும் கூறப்படுகிறது. “வெற்றி முக்கியமா? அல்லது விசுவாசம் முக்கியமா?” என்ற கேள்வியே தவெக-வுக்குள் இப்போது பெரிய சவாலாக உருவெடுத்துள்ளது. கட்சி ஆரம்பித்து இரண்டு ஆண்டுகளே ஆகும் நிலையில், இரண்டாம் கட்ட நிர்வாகிகளிடையே ஏற்பட்டுள்ள இந்த அதிகாரப் போட்டி விஜய்க்குப் புதிய தலைவலியை ஏற்படுத்தியுள்ளது.

தேர்தல் நெருங்கும் வேளையில், இந்த உட்கட்சி பூசலை விஜய் எப்படி கையாளப் போகிறார் என்பதே அரசியல் நோக்கர்களின் எதிர்பார்ப்பாக உள்ளது. விஜய் நேரடியாகத் தலையிட்டு இந்தச் சிக்கலைத் தீர்க்க வேண்டும் என்று தொண்டர்கள் கோரிக்கை விடுத்து வருகின்றனர். ஒருபுறம் திமுக, அதிமுக போன்ற பலமான கூட்டணிகளை எதிர்கொள்ள வேண்டிய சூழலில், கட்சிக்குள்ளேயே ஏற்பட்டுள்ள இந்த விரிசல் தவெக-வின் தேர்தல் வியூகத்தைப் பாதிக்குமோ என்ற அச்சமும் எழுந்துள்ளது.