மத்திய கிழக்கு நாடுகளில் நிலவும் போர் பதற்றத்தால் சமையல் எரிவாயு விநியோகத்தில் பாதிப்பு ஏற்படலாம் என்ற அச்சம் நிலவிய நிலையில், எல்.பி.ஜி தட்டுப்பாட்டைப் போக்க மத்திய அரசு ஒரு வலுவான திட்டத்தை வகுத்துள்ளது. தற்போது இந்தியாவின் எரிவாயு தேவையில் 60 சதவீதம் இறக்குமதி மூலமே பூர்த்தி செய்யப்படுகிறது; இதில் பெரும்பகுதி ஹார்முஸ் நீரிணை வழியாகவே வருகிறது. இந்தப் பாதையில் நிலவும் சிக்கல்களைச் சமாளிக்க, இனி வளைகுடா நாடுகளை மட்டுமே சார்ந்திருக்காமல் அமெரிக்கா, நார்வே, கனடா மற்றும் ரஷ்யா போன்ற பல்வேறு நாடுகளிலிருந்து எரிவாயுவைக் கொள்முதல் செய்ய இந்தியா அதிரடி முடிவெடுத்துள்ளது.
உள்நாட்டு உற்பத்தியை மேம்படுத்துவதில் கவனம் செலுத்துவதோடு, சுமார் 8 லட்சம் டன் எரிவாயு விநியோகத்தை இந்தியா ஏற்கனவே உறுதி செய்துள்ளது. இதன் மூலம் விநியோகச் சங்கிலி பன்முகப்படுத்தப்பட்டு, எந்தவொரு சவாலான சூழலிலும் தடையற்ற விநியோகம் கிடைப்பது உறுதி செய்யப்பட்டுள்ளது. இத்தகைய முன்னெச்சரிக்கை நடவடிக்கைகள் எதிர்காலத்தில் சிலிண்டர் தட்டுப்பாடு ஏற்படுவதைத் தவிர்ப்பதுடன், விலையேற்றத்தையும் ஓரளவிற்குக் கட்டுக்குள் வைக்க உதவும் என எதிர்பார்க்கப்படுகிறது.