மதங்கடந்த காதல்..! காதலனோடு சேர்த்து தங்கையையும் வெட்டிக்கொன்று புதைத்த அண்ணன்கள்… நெஞ்சை உறைய வைக்கும் கொடூரம்..!!

உத்தரப் பிரதேச மாநிலம் மொராதாபாத் அருகே உள்ள உம்ரி சப்ஜிபூர் கிராமத்தில், வெவ்வேறு மதத்தைச் சேர்ந்த முகமது அர்மான் (27) மற்றும் காஜல் சைனி ஆகிய இருவர் காதலித்து வந்துள்ளனர். சவூதி அரேபியாவிலிருந்து திரும்பிய அர்மான், காஜலைத் திருமணம் செய்ய முடிவெடுத்த நிலையில், பெண்ணின் குடும்பத்தினர் இதற்கு கடும் எதிர்ப்பு தெரிவித்துள்ளனர். கடந்த ஞாயிற்றுக்கிழமை (ஜனவரி 18, 2026) இருவரும் தனிமையில் சந்தித்துப் பேசியதைக் கண்ட காஜலின் சகோதரர்கள், ஆத்திரத்தில் இருவரையும் பிடித்துக் கட்டி வைத்துத் தாக்கியதுடன், கோடாரியால் வெட்டிக் கொடூரமாகக் கொலை செய்துள்ளனர். பின்னர், யாருக்கும் தெரியாமல் இருவரது உடல்களையும் ஊருக்கு வெளியே குழிதோண்டிப் புதைத்து மறைத்துள்ளனர்.

தனது மகனைக் காணவில்லை என அர்மானின் தந்தை அளித்த புகாரின் பேரில், ஜனவரி 22, 2026 அன்று காஜலின் சகோதரர்களைப் பிடித்துப் போலீஸார் விசாரணை நடத்தினர். அப்போது அவர்கள் செய்த கொடூரக் கொலையை ஒப்புக் கொண்டனர். இதனைத் தொடர்ந்து, புதைக்கப்பட்ட உடல்கள் தோண்டி எடுக்கப்பட்டு பிரேதப் பரிசோதனைக்கு அனுப்பப்பட்டன. இந்த இரட்டைக்கொலைச் சம்பவம் அப்பகுதியில் பெரும் பதற்றத்தை ஏற்படுத்தியுள்ளதால், மதக்கலவரம் வெடிக்காமல் இருக்கத் துப்பாக்கி ஏந்திய போலீஸார் குவிக்கப்பட்டுள்ளனர். குற்றவாளிகளான சகோதரர்கள் மீது கடுமையான சட்டப்பிரிவுகளின் கீழ் வழக்குப் பதிவு செய்யப்பட்டு சிறையில் அடைக்கப்பட்டுள்ளனர்.