உத்தரகாண்டின் புகழ்பெற்ற சுற்றுலாத் தலமான நைனிதால் வீதிகளில், ஒரு சிறுவன் பொதுமக்களுக்கு முன்னால் அசாத்தியமான மேஜிக் வித்தைகளைக் காட்டும் வீடியோ இணையத்தில் வைரலாகி வருகிறது. சில கப்புகள் மற்றும் சிறிய பந்துகளைக் கொண்டு, மிக வேகமாகவும் துல்லியமாகவும் அவன் செய்யும் கைகாட்டி வித்தைகளும், அவனது அதீத தன்னம்பிக்கையும், முகபாவனைகளும் பார்ப்பவர்களை வியப்பில் ஆழ்த்துகின்றன. அவனது வயதுக்கு மீறிய இந்த திறமையும், பார்வையாளர்களைத் தன்பால் ஈர்க்கும் விதமும் அனைவரையும் கவர்ந்துள்ளது.
திறமையானவர்களை எப்போதுமே சமூக ஊடகங்கள் வழியாக ஊக்குவிக்கும் மஹிந்திரா குழுமத்தின் தலைவர் ஆனந்த் மஹிந்திரா, இந்த சிறுவனின் வீடியோவைக் கண்டு மிகவும் ஈர்க்கப்பட்டார். தனது எக்ஸ் தளத்தில் இந்த வீடியோவைப் பகிர்ந்து, “இந்த சிறுவன் மிகுந்த திறமைசாலி” என்று பாராட்டியுள்ளார். மேலும், அந்த சிறுவன் இன்னும் நைனிதால் வீதிகளில்தான் மேஜிக் செய்து கொண்டிருக்கிறானா என்று கேள்வி எழுப்பியுள்ள அவர், அவனது படிப்புச் செலவிற்கும், மேஜிக் மீதான அவனது ஆர்வத்தை வளர்ப்பதற்கும் தான் உதவ விரும்புவதாகத் தெரிவித்துள்ளார்.
“சரியான வாய்ப்பும் வழிகாட்டுதலும் கிடைத்தால், இந்த சிறுவன் ஏன் உலகின் சிறந்த மந்திரவாதிகளில் ஒருவனாக மாறக்கூடாது?” என்ற கேள்வியை ஆனந்த் மஹிந்திரா எழுப்பியுள்ளார். அச்சிறுவன் அல்லது அவனது பெற்றோரைத் தொடர்பு கொள்ள யாராவது உதவுமாறும் அவர் கோரிக்கை விடுத்துள்ளார். ஆனந்த் மஹிந்திராவின் இந்த அன்பான முயற்சிக்கு சமூக வலைத்தளங்களில் பாராட்டுகள் குவிந்து வருகின்றன. இந்தியாவில் பல திறமைகளுக்குப் பஞ்சமில்லை என்றும், ஆனால் போதிய பொருளாதார வசதியும் வளங்களும் இல்லாததால் அவை முடங்கிவிடுகின்றன என்றும் நெட்டிசன்கள் கருத்து தெரிவித்து வருகின்றனர்.