வெங்காயம் சமையலில் இன்றியமையாத ஒரு பொருளாக இருந்தாலும், அதை வாங்கும்போதும் பயன்படுத்தும்போதும் சில விஷயங்களில் கவனமாக இருக்க வேண்டும். சில வெங்காயங்களின் தோலை உரிக்கும்போது கைகளில் ஒட்டக்கூடிய, கருப்பு புகை அல்லது மண் போன்ற கோடுகள் இருப்பதை நாம் பார்த்திருப்போம். காற்றில் ஏற்படும் வெப்பநிலை மாற்றங்களால் உருவாகும் இந்த கருப்பு புள்ளிகள் உண்மையில் ஆஸ்பெர்கிலஸ் நைகர் என்ற ஒரு வகையான பூஞ்சை ஆகும்.
இந்த கருப்பு பூஞ்சை கோடுகள் வெங்காயத்தின் வெளிப்புறத் தோலில் மட்டும் இருந்தால், அதை சமையலுக்குப் பயன்படுத்தலாம். பூஞ்சை இருக்கும் வெளிப்புறத் தோலை முழுமையாக நீக்கிவிட்டு, குளிர்ந்த ஓடும் நீரில் வெங்காயத்தை நன்றாகக் கழுவி சுத்தப்படுத்திய பிறகு பயன்படுத்துவது பாதுகாப்பானது. ஆனால், இந்த பூஞ்சை தொற்று வெங்காயத்தின் உட்புற இதழ்களிலும் பரவி, சதைப்பகுதி அழுகி இருந்தால் அந்த வெங்காயத்தை முற்றிலும் தவிர்ப்பது நல்லது.
பூஞ்சை பாதித்த வெங்காயத்தை தெரியாமல் சமையலில் சேர்த்துக் கொள்ளும்போது, அது சிலருக்கு ஒவ்வாமை மற்றும் உடல்நல உபாதைகளை ஏற்படுத்தக்கூடும். குறிப்பாக, பலவீனமான நோய் எதிர்ப்பு சக்தி கொண்டவர்களுக்கு இது வாந்தி, குமட்டல், தலைவலி, கடுமையான வயிற்று வலி மற்றும் வயிற்றுப்போக்கு போன்ற பாதிப்புகளை உருவாக்க வாய்ப்புள்ளது. எனவே, வெங்காயம் வாங்கும்போது பூஞ்சை இல்லாத நல்ல வெங்காயமாகப் பார்த்து வாங்குவதும், சேமிக்கும் போது ஈரப்பதம் இல்லாத உலர்ந்த இடத்தில் வைப்பதும் அவசியமாகும்.